Ватыканскі гісторык пра складанасці дыялогу паміж англіканамі і католікамі
Адкрыццё магчымасці
біскупскіх пасвячэнняў для жанчын у Англіканскай Царкве значна ўскладніць экуменічны
дыялог, лічыць галоўны рэдактар ватыканскай газеты “L’Osservatore Romano”, Джавані
Марыя Віян. “Але гэта, вядома, не азначае канец”, - сказаў спецыяліст па гісторыі
Касцёла ў інтэрв’ю італьянскай “La Stampa”. У той жа час, дактрынальны разрыў паміж
англіканамі і католікамі сур’ёзна павялічыўся, лічыць Віян. Гэта таксама тычыцца і
адносін паміж англіканамі і праваслаўнымі. Акрамя таго, апошняе рашэнне сінода Англіканскай
Царквы прынясе яшчэ большую нязгоду ў яе ўласныя шэрагі. Многія англікане, асабліва
ў паўднёвым паўшар’і, выступаюць рашуча супраць біскупскіх пасвячэнняў жанчын.
Захаванню
экуменічнага дыялогу, лічыць ватыканскі журналіст і гісторык, паспрыяюць асабістыя
кантакты і сяброўства паміж хрысціянамі розных канфесій. Ён нагадаў, што адносіны
паміж Папам і англіканскім Прымасам узмацніліся яшчэ падчас пантыфікату Яна XXIII
(1958-1963). Таксама цяперашні арцыбіскуп Кентэрберыйскі, Джасцін Уэлбі, падчас нядаўняга
візіту ў Ватыкан, выказаў сваю блізкасць і глыбокую ўдзячнасць папе Францішку.