Ամբողջ օրուան ընթացքին հարաւային Լիբանանի սահմաններուն վրայ տիրած զգուշաւոր հանդարտութենէն
եւ բանակին ու ՖԻՆԻՒԼ-ի միջազգային խաղաղապահ ուժերուն շրջուն ջոկատներուն խիստ հսկողութենէն
ետք, գիշերուան ժամը 10:30-ին, հարաւային Լիբանանի եւ յատկապէս Սուրի Քլայլէ հովիտէն
երկու հրթիռներ արձակուեցան դէպի բռնագրաւեալ Պաղեստին: Հրթիռարձակումէն անմիջապէս
ետք իսրայէլեան ուժեր յայտարարեցին, որ այդ հրթիռները հասած են Գալիլիա, եւ անմիջապէս
հակադարձեցին այդ արարքին` ռմբակոծելով Սուրի հարաւային շրջանը, ինչպէս նաեւ Ռաշիտիէն,
Հաուշը, Նաքուրան, իսկ Քֆարքիլայի շրջանին մէջ իսրայէլեան շրջուն ջոկատը խստացուց իր
հսկողութիւնը: Իսրայէլեան օդուժը իր կարգին թռիչքներ գործեց Սուրի եւ անոր շրջակայքին
վերեւ, իսկ իսրայէլեան երկու ուղղաթիռներ թռիչքներ գործեցին Այթա Շաապի եւ Սուրի Հըննիէ
գիւղաքաղաքին վերեւ: Իսրայէլի կողմէ Լիբանանը ռմբակոծելու զուգահեռ բանակը զգուշացուց
քաղաքացիները Հաուշ-Նաքուրա մայրուղին օգտագործելէ եւ ուշ գիշերին փակեց մայրուղին: Իսրայէլեան
ուժերուն կողմէ շուրջ մէկ ժամուան ընթացքին կատարուած ռմբակոծումներէն ետք կացութիւնը
դարձեալ հանդարտեցաւ: Արսալի Բարձունքներուն Վրայ Միւս կողմէ, Արսալի բարձունքներուն
վրայ Հըզպալլայի եւ Ժապհաթ Նուսրայի ու ՏԱՀԵՇ-ի անդամ զինեալներուն միջեւ բախումները
շարունակուեցան: Անպաշտօն աղբիւրներ հաղորդեցին, որ Արեւմտեան Պեքաայի եւ Լիբանանի
արեւելեան լեռնաշղթային վրայ արձանագրուող զինեալ բախումներուն ընթացքին Հըզպալլա կրցած
է մաքրագործել Ժապհաթ Նուսրայի պատասխանատուներէն Ահմետ Եաքզանը: Սուրիական աղբիւրներուն
համաձայն, կիրակիէն երկուշաբթի լուսցող գիշերուան ընթացքին, Արսալի եւ Մաարա գիւղին միջեւ
արձանագրուած զինեալ բախումներուն ընթացքին զոհուած են Հըզպալլայի 7 մարտիկներ եւ վիրաւորուած
31 ուրիշներ, մինչդեռ Հըզպալլայի մարտիկներ կրցած են գերեվարել Նուսրայի 14 զինեալներ,
ինը զինեալներ սպաննուած են եւ 23 ուրիշներ վիրաւորուած` բախումներուն ընթացքին: