Kupa e Botës: imzot Genshvajn tregon si është parë finalja e Marakanasë në Vatikan
Mëse një miliard vetë u ndalën dje për 120 minuta për të parë ndeshjen finale të Kampionatit
Botëror të Futbollit, fituar 1-0 nga Gjermania, e cila luante kundër Argjentinës,
në stadiumin Marakanà të Rio-de-Zhanejros. Ndeshja u quajt me shaka “finalja e dy
Papëve”, pasi kombëtarja argjentinase pati si përfaqësues të nivelit të lartë Papën
Françesku, ndërsa ajo gjermane, Benediktin XVI. …pavarësisht se asnjëri nga të dy
nuk e pa lojën, siç tregon në mikrofonin tonë prefekti i Shtëpisë Papnore, imzot Georg
Genshvajn. Gjithsesi, rrjetet shoqërore e shfrytëzuan këtë përkim të rastësishëm ndërmjet
kombëtareve që luanin dhe kombësive të papëve, me lloj-lloj fotografish e komentesh,
që bënë xhiron e botës. Për to e për rolin, që mund të luajë futbolli në takimin ndërmjet
kombeve e kulturave të ndryshme, të dëgjojmë imzot Genshvajn, i cili – po e kujtojmë
– është edhe sekretari i veçantë i Papës së nderit: Mbështeta si
tifoz, skuadrën time të zemrës, që është Gjermania. E pashë ndeshjen në shtëpi, së
bashku me laiket “Memores Domini”, që ishin, edhe ato, tifoze të Gjermanisë, prandaj
në fund, ishim të gjithë të kënaqur, megjithëse më vjen keq për argjentinasit. Luajtën
mirë, por më duket se Gjermania e meritoi fitoren. Shumë njerëzve u ka shkuar
në mend pyetja: Po Papa Benedikti a e pa ndeshjen? A e mori vesh rezultatin? E
ftova ta shihnim bashkë ndeshjen, por ai falenderoi dhe preferoi të shkojë për të
fjetur. Sigurisht, sot në mëngjes e informova, por ai më pa që në fytyrë, e cila rrezatonte
një mesazh të qartë. Pastaj i thashë si shkoi ndeshja e i tregova rezultatin. Natyrisht,
u gëzua, apo jo? Po e jo, sepse në skuadër ka disa bavarezë e nga njëra anë,
kjo ia ngroh zemrën shumë, por nga ana tjetër tha: “Shpresojmë që argjentinasit ta
marrin veten shpejt”. Po një me zero nuk është ndonjë rezultat përulës. E
kur flasim për Argjentinën, mendimi shkon tek Papa Françesku. A keni folur me Atin
e Shenjtë për ndeshjen? Mund të na thoni diçka? Akoma jo. I bëra “ngushëllimet”
e mia më të ndjera sekretarit të tij, don Fabianit, e ai m’u përgjigj shkurt, qartë,
por në mënyrë bindëse e më bëri urimet për fitoren e skuadrës sonë. Në rrjetet
shoqërore xhironte fotografia e dy papëve, që luteshin, secili për skuadrën e vet… E
pashë edhe unë e duhet të them se kam qeshur me lot, pasi shihet se futbolli ka forcë
për të bashkuar. E pastaj, dukej qartë që ishte shaka, që gjërat thuheshin me ironi,
por gjithnjë me simpati e sinqeritet… Mendoj se ky rast u kujtoi njerëzve se marrëdhëniet
ndërmjet dy papëve janë shumë të mira. Në tweet-in para ndeshjes, por edhe
në një mesazh të vetin, Papa Françesku nënvizon se Kampionati Botëror i Futbollit
e sporti, në përgjithësi, janë raste takimi… Papa Françesku flet shpesh për
takimin – kjo është fjalë kyçe për të – e sporti, sidomos futbolli, është rast i volitshëm
për t’u takuar me të tjerët me sportivitet e sinqeritet. Ka rëndësi takimi, si i tillë.
Është e qartë, vlen edhe rezultati, por ka më tepër rëndësi takimi. E nëse për të
dyja skuadrat, takimi është pozitiv, mendoj se rrezaton forcë të madhe jo vetëm për
22 lojtarët, por edhe për njerëz të tjerë, edhe jashtë dy vendeve përfaqësuese, në
të gjithë botën. Finalja e Kupës së Botës, fatkeqësisht, përkoi me shkallëzimin
e konfliktit izraelito-palestinez. Këshilli Papnor për Kulturën propozoi një minut
heshtje në Kampionat, nismën “Pause for Peace” (Pauzë për paqen)… E ndjek me
shqetësim të madh gjendjen në Tokën Shenjte. Papa e përmendi edhe në Engjëllin e Tënzot
se lutja është shumë e rëndësishme në këto raste. Lutja me dy presidentët, atë izraelit
e atë palestinez, si edhe me Patriarkun Ekumenik, para një muaji, është sinjal e ky
sinjal duhet e do të japë fryte të mira, megjithëse aktualisht, gjendja është shumë
shqetësuese. Edhe sporti mund të ndihmojë, apo jo? Kemi parë disa herë se
sporti i ka afruar skuadrat e dy kombeve në luftë… Po. Jam i bindur, madje
shumë i bindur, për faktin se politika nuk është në gjendje t’i bëjë të takohen dy
skuadra që, politikisht, janë kundër njëra-tjetrës, por sporti, futbolli, mund ta
bëjë këtë. Mendoj se kjo është një mundësi, që duhet përforcuar e duhet vlerësuar.