Папа прывітаў пацыентаў і супрацоўнікаў рымскай клінікі “Джэмэллі”
Папа Францішак 13
ліпеня 2014 г. скіраваў спецыяльнае відэапасланне да пацыентаў і супрацоўнікаў рымскай
клінікі “Джэмэллі”. У ім Пантыфік папрасіў прабачэння за тое, што не змог прыбыць
да іх 27 чэрвеня 2014 г. ва ўрачыстасць Найсвяцейшага Сэрца Езуса. Візіт быў адменены
ў апошнюю хвіліну з-за недамагання Пантыфіка. Як паінфармаваў Францішак у яго таго
дня быў вельмі моцны боль галавы. Святы Айцец сказаў, што разумее іхняе расчараванне,
а таксама ўсіх тых, хто працаваў з запалам і энтузіязмам ў падрыхтоўцы гэтага візіту.
“Я асабліва разумею расчараванне хворых, якія былі ўжо гатовыя памаліцца разам са
мною падчас св. Імшы і якіх я хацеў прывітаць асабіста”, - адзначыў Папа. Святы Айцец
заклікаў хворых, а таксама медыцынскі персанал, каб давалі сведчанне таму, што толькі
Бог з’яўляецца нашай сілай. “Вы хворыя, што зазнаеце слабасці цела, можаце сведчыць
з сілай людзям, якія знаходзяцца побач вас, як каштоўным дарам жыцця з’яўляецца Евангелле
і міласэрная любоў Айца, а не грошы і ўлада”, - сказаў Папа і дадаў, што важныя людзі
гэтага свету, не могуць дадаць ні аднаго дня да свайго жыцця.
На заканчэнне
свайго відэазварота Папа яшчэ раз адзначыў, што вельмі жадаў сустрэцца з імі, але
мы не з’яўляемся гаспадарамі нашага жыцця і не можам ім распараджацца паводле нашага
задавальнення. “Мы павінны прымаць нашы слабасці. Разам са мною мейце давер у тое,
што толькі Бог з’яўляецца нашай сілай”, - завершыў сваё відэапасланне папа Францішак.