Պքերքէի համար նախագահական ընտրութիւնը առաջնահերթութիւն է
Մարոնի համայնքի Պշարա Ռայի պատրիարքը երէկ Տիմանի մէջ ընդունեց լիբանանեան բանակի հրամանատար
զօր. Ժան Քահուաժին, որուն հետ քննարկեց լիբանանեան իրադարձութիւնները, յատկապէս բանակին
կողմէ որդեգրուած ապահովական միջոցառումները` պահպանելու համար Լիբանանի եւ լիբանանցիներուն
անվտանգութիւնը: Զօր. Քահուաժի Ռայի պատրիարքին ներկայացուց բանակին եւ լիբանանեան
ապահովական ուժերուն միջեւ աշխատանքն ու գործակցութիւնը համադրելու կարեւորութիւնը` աւելցնելով,
որ երկրին ապահովական կայունութիւնը պահպանելու իմաստով ոչ մէկ ճիգ կը խնայուի: Միւս
կողմէ, «Ժումհուրիա» օրաթերթին համաձայն, Ռայի պատրիարքը կը մերժէ նախագահական աթոռի
թափուր մնալու ընթացքին երեսփոխանական ընտրութիւններ կատարել: Ռայի պատրիարքը հաստատած
է, որ Պքերքէի համար նախագահական ընտրութիւնը առաջնահերթութիւն է, ապա անոր կը յաջորդեն
սահմանադրական մնացեալ պարտաւորութիւնները: