Համագործակցութեան համաձայնագիրներ կը ստորագրուին Հայաստանի եւ Արժանթինի միջեւ։
ՊՈՒԷՆՈՍ ԱՅՐԵՍ.- Պաշտօնական այցելութեամբ Արժանթինի մայրաքաղաք Պուէնոս Այրես կը գտնուի
ՀՀ նախագահ Սերժ Սարգսեանի գլխաւորած պատուիրակութիւնը: Երկուշաբթի 7 Յուլիսին, նախագահը
հանդիպում ունեցաւ Արժանթինի հանրապետութեան փոխնախագահ, Ծերակոյտի նախագահ Ամատօ Պուդուի
հետ: Արժանթինի նախագահ Քրիսթինա Ֆերնանտեզ Տէ Քիրշներ առողջական պատճառներով անկարող
եղած էր ինք անձամբ հանդիպելու նախագահ Սարգսեանի հետ, հետեւաբար երկկողմ յարաբերութիւնները
կայացան Արժանթինի հանրապետութեան փոխնախագահին հետ: Նախագահ Ֆերնանտեզ Տէ Քիրշներ առողջական
խնդիրներուն պատճառով ջնջած էր իր մասնակցութեամբ նախատեսուած բոլոր պաշտօնական հանդիպումները,
ինչպէս եւ 9 Յուլիսին երկրի ազգային տօնի կապակցութեամբ կազմակերպուած միջոցառումները: Հայաստանի
եւ Արժանթինի բարձրաստիճան հանդիպումներուն ընթացքին շեշտուեցաւ հայ-արժանթինեան բարեկամութեան
բարձր մակարդակը եւ այդ բարեկամութիւնը գործնական հարթութիւն տեղափոխելու փոխադարձ պատրաստակամութիւնը:
Արժանթինի փոխնախագահը դրուատանքի խօսքերով արտայայտուեցաւ արժանթինահայ գաղութի մասին,
ըսելով թէ ոչ միայն մեծ, այլեւ ազդեցիկ գաղութ է եւ մեծ դեր ունի հայ-արժանթինեան կապերու
սերտացման գործին մէջ: Ան ընդգծեց նաեւ, որ հակառակ երկու երկիրներու հեռաւորութեան,
երկու ժողովուրդներուն միջեւ ջերմ բարեկամական կապեր գոյութիւն ունին։