Իսրայէլեան բանակը երէկ Կազայի դէմ իր գործողութիւններուն թափ տուաւ, եւ անոր օդուժն
ու ծովուժը քանի մը ժամուան ընթացքին արդէն 50 թիրախներ հարուածեցին` պատճառելով տասնեակներով
զոհեր ու վիրաւորներ: Իսրայէլեան սեղմ նախարարաց խորհուրդը իր կարգին վաւերացուց 45 հազար
իսրայէլացի պահեստի զինուորներ զօրակոչի ենթարկելու որոշում մը: Իսրայէլեան բանակէն աղբիւր
մը նշեց, որ բանակը Կազայի մօտ սկսած է ուժեր կուտակել` առ ի պատրաստութիւն ներխուժում
կատարելու: Պաղեստինեան Համաս շարժումը իր կարգին զգուշացուց բնակարաններու ռմբակոծումէն`
նշելով, որ Իսրայէլ անոր համար սուղ գին պիտի վճարէ: Համասի բանբեր Ֆաուզի Պարհում նշեց,
որ պաղեստինեան դիմադրութիւնը թիրախներու ցանկ մը ունի եւ պատահական հակադարձութիւն չի
կատարեր, այլ ընտրովի եւ ցաւցնող կերպով: Պաղեստինեան իշխանութեան նախագահ Մահմուտ
Ապպաս իր կարգին կոչ ուղղեց քաղաքական եւ մարտական գետնի վրայ միջպաղեստինեան միասնականութիւնը
ամրապնդելու եւ ներկայ հանգրուանի դիմակայման համար միջպաղեստինեան համակարգում եւ գործակցութիւն
ցուցաբերելու: Ան նաեւ Ֆաթհի ղեկավարութեան եւ պաղեստինեան բոլոր հատուածներուն կոչ
ուղղեց պաշտպանելու միջպաղեստինեան հաշտութեան համաձայնութիւնը եւ պատմական պատասխանատուութեան
տէր կանգնելով` ներկայ շրջադարձային հանգրուանին պաղեստինեան ազգային նպատակը պաշտպանելու: Իսրայէլեան
պատկերասփիւռի 2-րդ կայանը հաղորդեց, որ երէկ առաւօտեան կանուխ ժամերէն մինչեւ երեկոյեան
ժամը 6:00 Իսրայէլի դէմ արձակուած են 70 հրթիռներ: Իսրայէլեան «Պողպատեայ գմբէթ» հակահրթիռային
պաշտպանութեան համակարգը յաջողած է անոնցմէ միայն 8-ն վնասազերծել: Աւելի ուշ` Քասսամի
ջոկատները յայտարարեցին, որ իրենց անդամներէն բաղկացած մասնայատուկ ուժ մը ծովու ճամբով
ներխուժած է Աշքելոնի մէջ իսրայէլեան ծովուժին պատկանող ռազմակայան մը, ինչպէս նաեւ 10
հրթիռներով ռմբակոծած է Զայքիմ եւ Եաֆթահ ռազմակայանները: Քասսամ ջոկատներու բանբերը
խոստացաւ գործողութիւնները ընդլայնել, եթէ Իսրայէլ Կազայի դէմ յարձակումները շարունակէ: Իսրայէլի
վարչապետ Պենիամին Նեթանիահու բանակին հրամայեց Կազայի դէմ գործողութիւնները որակական
ձեւով ընդլայնելու: Ան յայտարարեց. «Կազայի դէմ գործողութիւնը կրնայ երկար տեւել, մինչեւ
ամբողջական հանդարտութեան իրագործումը»: Մինչ Ուաշինկթըն եւ Պան Քի Մուն դատապարտեցին
Կազայէն Իսրայէլի դէմ կատարուած հրթիռարձակումները` Եգիպտոսի արտաքին գործոց նախարարութիւնը
Իսրայէլի կոչ ուղղեց Կազայի դէմ գործողութիւնները դադրեցնելու եւ ինքնազսպում ցուցաբերելու,
իսկ Թուրքիոյ արտաքին գործոց նախարարութիւնը Իսրայէլի կոչ ուղղեց` «անմիջապէս» դադրեցնելու
Կազայի դէմ իր յարձակումը եւ «իր կիրարկած հաւաքական պատիժի քաղաքականութենէն հրաժարելու»: