У Ватыкан надышла амаль 1 тыс. анкет з адказамі па праблемах сям’і
У Ватыкан, у дадатак
да матэрыялаў, дасланых біскупскімі канферэнцыямі, надышлі 983 анкеты ад касцёльных
супольнасцяў і індывідуальных вернікаў з адказамі на пытанні адносна сям’і, сужэнства
і сексуальнасці. Яны паслужаць для падрыхтоўкі да Сіноду Біскупаў на тэму сям’і, які
ў кастрычніку 2014 г. пройдзе ў Ватыкане. Амаль дзве траціны анкет – 64%, надышлі
з Еўропы, паведаміў генеральны сакратар біскупскай асамблеі, кардынал Ларэнца Балдзісэры.
Найменшая зацікаўленасць назіралася ў Азіі. Адтуль прыйшло 2% адказаў, прызнаўся іерарх.
Сакратарыят Сінода Біскупаў працягвае збіраць водгукі на даследаванне. Са
114 епіскапатаў амаль 90% далі адказы на анкеты. Ініцыяванае папам Францішкам апытанне
стала падставай для распрацоўкі апублікаванага на мінулым тыдні працоўнага дакументу
пазачарговай сесіі Сінода Біскупаў па пытаннях сям’і. У ім адзначаецца глыбокі разрыў
паміж касцёльным навучаннем і практыкай жыцця католікаў.
Кардынал Балдзісэры
паддаў крытыцы аднабаковае прадстаўленне мэтаў біскупскай асамблеі, якія некаторымі
былі зведзены да пытання касцёльнага статусу католікаў, якія развяліся і ўступілі
ў новыя саюзы. Станоўчым з’яўляецца тое, што гэтай з’явы не назіраецца ў дасланых
у Ватыкан адказах на анкеты, адзначыў ватыканскі іерарх.