Imzot Zimovski: përpjekje globale për të fituar mbi tuberkulozin
“Është detyra jonë të punojmë që e drejta për mbrojtjen e shëndetit të jetë realitet
për të gjithë qytetarët”. Këtë nënvizoi kryeipeshkvi Zygmunt Zimovski në Konferencën
për zhdukjen e tuberkulozit, që vijon në Romë. Kryetari i dikasterit papnor për shëndetin
theksoi se ndërmjet viteve 1995 e 2012 u shpëtuan 22 milionë njerëz të prekur nga
Tbc, por edhe se të dhënat mbi këtë sëmundje nuk duhen shikuar me vetëkënaqësi. Prelati
kujtoi se vetëm në vitin 2012 ka pasur 8,6 milionë raste të sëmundjes e 1.3 milionë
njerëz kanë vdekur nga tuberkulozi. Tuberkulozi, shtoi prelati, është sëmundje,
që prek më shumë njerëzit e varfër e të ligësht, si gratë, fëmijët dhe të sëmurët
nga Sida. Prej këndej, duhet një strategji globale kundër kësaj sëmundjeje vrastare.
Institucionet shëndetësore të bazuara mbi fenë, që shpesh punojnë në gjirin e bashkësive
me të ardhura të pakta, do të jenë partnerë të rëndësishëm në përpjekjen për ta bërë
mjekimin e tuberkulozit të mundshëm për të gjithë ata, që kanë nevojë.