Lindja e Mesme: bashkësia ndërkombëtare kërkon të ndalet gjeratorja e dhunës
Të ndalet gjeratorja e dhunës, është kërkesa e njëzëshme e bashkësisë ndërkombëtare,
drejtuar të gjitha palëve të interesuara në Lindjen e Mesme, pas rrëmbimit dhe vrasjes
së të riut palestinez në Jeruzalem, vrasje që, ka shumë gjasë, të jetë kryer për të
marrë gjakun e tre të rinjve seminaristë izraelitë. Ndërkaq edhe në 24 orët e fundit
nuk pushoi breshëria e raketave drejt Izraelit, nisur nga Rripi i Gazës. E edhe përgjigjja
e Izraelit, që vijon të godasë territoret e kontrolluara nga Hamasi.
Etja për
hakmarrje në Lindjen e Mesme rrezikon ta rrëmbejë situatën e ta flakë në një vorbull
tensionesh, në të cilën mund të humbasin jetë të tjera njerëzore. Për këtë ka frikë
bashkësia ndërkombëtare, që u bën thirrje të gjitha palëve. Thirrje nga sekretari
i OKB-së, Ban Ki-moon, nga sekretari i Shtetit Amerikan, John Kerry dhe nga të gjitha
kancelaritë evropiane, që e dënuan ashpër vrasjen. “Nëse i riu arab u vra për shkaqe
nacionalistike, atëherë jemi para një akti të tmerrshëm, të urryer”, kështu u shpreh
njëra nga familjet e seminaristëve hebrenj të vrarë. Gjaku do gjak e kush me gjak
e nis, do ta mbarojë ca më keq me gjak, qorton patriaku latin Twal i Jeruzalemit. Po
tensioni mbetet shumë i lartë. Qeveria izraelite ka premtuar se do t’i dënojë ushtarakët,
që vijojnë të botojnë kërcënime kundër arabëve në rrjetin shoqëror. Nga ana e tij,
Hamasi vijon të premtojë se do ta bëjë Izraelin t’i paguajë shtrenjt të gjitha krimet”.
Ndërsa tërë pasditen e djeshme në Jeruzalemin lindor vijuan ndeshjet ndërmjet palestinezëve
e policisë së shtetit hebraik. Në të njëjtat orë, aviacioni izraelit goditi disa zona
të Gazës, prej nga edhe sot vijuan të nisen raketa drejt Izraelit.