«Թղթակիցներ առանց սահմաններու»ն կը Քննադատէ Հայաստանի մէջ լրագրողներուն նկատմամբ ոստիկանութեան
բռնութիւնը։
ԵՐԵՒԱՆ, «Նիուզ».– «Թղթակիցներ առանց սահմաններու» միջազգային կազմակերպութիւնը իր անհանգստութիւնը
յայտնած է Հայաստանի մէջ լրագրողներուն դէմ գործադրուած բռնութեան դէպքերուն առնչութեամբ: Կազմակերպութեան
կայքին համաձայն՝ 23 Յունիսին լրագրողները ոստիկանութեան բաժանմունքին մօտ, 60 գործիչներու
հետ սպասած են նոյն օրը աւելի կանուխ ձերբակալուած գործիչներու ազատ արձակման։ Այդ
միջոցին ոստիկան մը հարուածած է լրագրող Անի Գէորգեանի դէմքը, ուրիշ մը հարուածած է նաեւ
Արփի Մախսուդեանը, երբ վերջինս տեղի ունեցածը կը նկարէր հեռաձայնով: Ոստիկանները յարձակած
են նաեւ «Gala TV»ի նկարիչ Փայլակ Ֆահրադեանի վրայ, եւ գետին նետած անոր ելեկտրոնային
նոթպուքը: «Մենք վճռականօրէն կը քննադատենք լրագրողներուն դէմ ոստիկանութեան բռնութիւնը,
մանաւանդ որ անոնք պարզապէս օրինաւոր կերպով իրենց աշխատանքը կը կատարեն: Ոստիկանութեան
գործողութիւնները պէտք չէ անպատիժ մնան, այլապէս անոնց յարձակողական կեցուածքը կրնայ
կրկնուիլ եւ դառնալ բնական ընթացք։ Լրագրողներուն վրայ յարձակած ոստիկանները պէտք է պատասխանատուութեան
ենթարկուին», յայտարարած է Եոհան Պիրը՝ կազմակերպութեան Արեւելեան Եւրոպայի եւ Կեդրոնական
Ասիոյ բաժինի ղեկավարը: Կազմակերպութեան յայտարարութեան մէջ կը նշուի, որ այդ օրը
ձերբակալուած է 27 գործիչ։