Papa Konferencës për minat kundër njeriut: përdorimi i armëve është disfatë për të
gjithë
“Asnjë fëmijë nuk duhet të jetojë me frikën e minave”. Këto fjalë i lexojmë në një
mesazh, drejtuar nga sekretari i Shtetit të Vatikanit, kardinali Pietro Parolin, në
emër të Papës Françesku, Konferencës për rishikimin e Konventës mbi ndalimin e përdorimit
të minave kundër njeriut, mbajtur këto ditë në Maputo të Mozambikut. Në mesazh nënvizohet
me forcë se përdorimi i armëve është disfatë për të gjithë.
"Përdorimi i armëve
në përgjithësi, e i minave në veçanti, është humbje për të gjithë”. I fuqishëm, denoncimi
i Papës Françesku, drejtuar Konferencës së Maputos kundër minave, të cilat rrezikojnë
jetë njerëzore. Armë, që përdoren nga njerëz të ulët, që e zgjasin luftën e ushqejnë
frikën edhe pas përfundimit të ndeshjeve. Këto armë theksohet, i shtojnë dështimit
njerëzor, shkaktuar nga lufta, ndjesinë e frikës, e cila sundon mbi stilin e jetës
dhe e tjetërson ndërtimin e paqes. Nëse duam me të vërtetë siguri, stabilitet
e paqe, vijon dokumenti, atëherë duhet t'i reduktojmë depot e armëve, t’i zhdukim
armët, që nuk kanë asnjë arsye të jenë në një shoqëri njerëzore, për të investuar
në fushën e edukimit, të shëndetit, të mbrojtjes së Planetit tonë. Papa Françesku
i nxit të gjitha vendet të impenjohen në fushën e Konventës, që të mos ketë kurrë
më viktima të minave e asnjë fëmijë të mos frikësohet prej tyre. Konventa, si kjo
mbi minat, shkruhet akoma në mesazh, nuk janë kuadër i akullt juridik, por sfidë për
të gjithë ata, që duan ta mbrojnë e ta ndërtojnë paqen e të kujdesen për njerëzit
më të ligshtë. Uroj që kjo kjo Konventë, nënvizon Papa, të jetë model për proceset
e tjera, posaçërisht për armët bërthamore e për armë, që nuk do të duhej të ekzistonin.
Ta vëmë njeriun, nënvizon me forcë Françesku në përfundim, në qendër të përpjekjeve
tona për çarmatimin.