Papa: për ekumenizmin duhet “teologjia e bërë në gjunjë”
Duhet ta lëmë Shpirtin Shenjt të na prijë, për të ecur drejt unitetit të të krishterëve.
Këtë theksoi Papa në audiencën me Delegacionin ekumenik të Patriarkanës së Kostandinopojës,
të cilin e priti në prag të Solemnitetit të Shenjtorëve Pjetër e Pal, Pajtorë të Romës.
Papa nënvizoi se edhe duke u nisur nga perspektiva të ndryshme, përmes teologjisë
së bërë në gjunjë, mund të shpejtohet hapi në rrugën drejt bashkimit.
Të ndash bashkë
gëzimet e të jesh vëlla me tjetrin. Me këto fjalë e priti Papa delegacionin e Kishës
motër të Kostandinopojës, duke kujtuar posaçërisht Patrikun Ekumenik, Bartolomeun
I, “vëllain e dashur”, me të cilin jetoi përvojën e shtegtimit në Tokën Shenjte e,
më pas, të Lutjes për paqe në Kopshtet e Vatikanit. Papa kujtoi edhe përqafimin e
Palit VI me Atenagorën. Gjest profetik, vërejti. Hapi një udhë, që nuk u mbyll më:
“Zoti na dhuroi këto raste takimi vëllazëror, në të cilat patëm mundësi t’i shprehim
njëri-tjetrit dashurinë në Krishtin, që na lidh, e të përtërijmë vullnetin e përbashkët
për të vijuar krah për krah ecjen në rrugën drejt bashkimit tonë të plotë”. E
dimë mirë, shtoi, se uniteti është dhuratë e Hyjit e se, falë forcës së Shpirtit Shenjt,
mund ta shikojmë njëri-tjetrin me sytë e fesë e ta pranojmë ashtu si është në planin
e Zotit, e jo ashtu si e bënë pasojat historike të mëkateve tona: “Nëse, të
prirë nga Shpirti Shenjt, mësohemi ta shikojmë njëri-tjetrin në Hyjin, do të jetë
akoma më i zhdërvjellët hapi ynë e më i shkathët bashkëpunimi në fusha të ndryshme
të jetës së përditshme, e cila tashmë na bashkon lumturisht”. Ky shikim teologal,
vijoi, ushqehet me fe, me shpresë e me dashuri. Është i aftë të lindë një reflektim
teologjik të vërtetë, që s’është tjetër, veçse pjesëmarrje në shikimin e Zotit mbi
vetveten e mbi ne. Reflektim, shtoi që nuk mund të bëjë tjetër, veçse të na afrojë
njëri me tjetrin në udhën drejt unitetit, edhe pse nisemi nga perspektiva të ndryshme:
“Besoj e lutem që puna e Komisionit të përbashkët ndërkombëtar të jetë shprehje
e këtij mirëkuptimi të thellë, e kësaj teologjie ‘të bërë në gjunjë’. Reflektimi mbi
konceptet e parisë e të sinodalitetit, mbi kungimin në Kishën universale e mbi shërbimin
e Ipeshkvit të Romës, nuk do të jetë, atëhere, rragatje akademike, as diskutim i thjeshtë
ndërmjet qëndrimeve të papajtueshme”. Kemi të gjithë nevojë t’ia hapim me guxim
e besim zemrën Shpirtit Shenjt e ta shikojmë me sytë e Krishtit udhën e ekumenizmit
shpirtëror, të përforcuar nga martirizimi i shumë të krishterëve, që realizuan ekumenizmin
e gjakut.
Delegacionin e dërguar nga Bartolomeu e udhëheq metropoliti i
Pergamos, Zizioulas i cili, në fjalën e tij, vuri theksin mbi rëndësinë e takimeve
të Papës me Patrikun e Kostandinopojës si dhe mbi punën e Komisionit të përbashkët
ndërkombëtar për dialogun teologjik të Kishës katolike me Kishën ortodokse: “The
Mixed International Commission of the Dialogue…” Komisioni ndërkombëtar i përbashkët
për dialogun, theksoi, do të mblidhet në asamblenë plenare shtatorin e ardhshëm, për
të vijuar diskutimin lidhur me parinë në Kishë. Argument i vështirë, pranoi metropoliti
i Pergamos, por me ndihmën e Zotit kemi shpresë se do të përparojmë në këtë fushë.
Mënyra sesi Shenjtëria Juaj e kupton dhe e vë në jetë parinë kishtare, përfundoi,
i jep frymëzim e shpresë përpjekjeve tona për t’u marrë vesh edhe në këtë temë të
vështirë.