«Պաղեստինը պատրաստ է Իսրայէլի հետ վերսկսելու բանակցութիւններուն» կ՛ըսէ Ապպաս
ԻԹԱՐ-ԹԱՍՍ կը հաղորդէ, որ Պաղեստինեան իշխանութեան նախագահ Մահմուտ Ապպաս Ռուսիոյ արտաքին
գործոց նախարարութեան դիւանագիտական ակադեմիային մէջ իր արտասանած խօսքին մէջ յայտարարած
է, որ Պաղեստինը պատրաստ է վերսկսելու Իսրայէլի հետ բանակցութիւններուն, եթէ ազատ արձակուի
պաղեստինցի գերիներու 4-րդ խումբը: «Մենք կը հաստատենք մեր` խաղաղութեան ձգտումը:
Մենք պատրաստ ենք յառաջիկայ 9 ամիսներուն ընթացքին վերադառնալու բանակցութիւններու սեղան,
եթէ Իսրայէլ ազատ արձակէ չորրորդ խումբը պաղեստինցի գերիներուն, որոնք շատոնց կը տառապին
իսրայէլեան բանտերուն մէջ», ըսած է Ապպաս: Պաղեստինեան իշխանութեան նախագահը նաեւ
նշած է, որ բանակցութիւններու վերսկսման պարագային առաջին երեք ամիսները պիտի յատկացուին
Պաղեստինի եւ Իսրայէլի միջեւ սահմանազատման` ըստ 4 յունիս 1967-ի սահմաններուն, եթէ Իսրայէլ
այդ երեք ամիսներուն ընթացքին դադրեցնէ բնակավայրերու շինարարութեան հոլովոյթը: «Խաղաղութիւնը
մեր նպատակն է, որուն իրագործման կը ձգտինք` շրջափակումին վերջ տալու եւ անկախ պետութիւն
ստեղծելու համար», աւելցուցած է Ապպաս: