«Կրցանք բացայայտել մեր թշնամիներուն ահաբեկչական ծրագիրները եւ ձախողեցուցինք անոնց
նպատակները» շեշտեց Վարչապետ Սալամ
Լիբանանի կառավարութիւնը հինգշաբթի, 27 յունիսին կէսօրէ առաջ, վարչապետարանին մէջ
գումարեց իր ընթացիկ նիստը` նախագահութեամբ վարչապետ Թամմամ Սալամի: Նիստէն ետք վարչապետ
Սալամ մամլոյ ասուլիսի մը ընթացքին շեշտեց, որ Լիբանանի եւ Ծոցի երկիրներուն միջեւ գործակցութիւնը
առկայ է, իսկ այն տեղեկութիւնները, թէ կարգ մը պանդոկներու մէջ ահաբեկիչներ կը գտնուին`
Լիբանան արեւմտեան պետութիւններէ ստացած է: Վարչապետ Սալամ յայտնեց, որ լիբանանեան
ապահովական կառոյցները ցարդ կրցած են ձախողեցնել երեք ահաբեկչական գործողութիւններ, որոնք
իրենց նպատակին չեն հասած: «Սակայն կրնայ ըլլալ, որ տակաւին կան նաեւ այլ ահաբեկչական
գործողութիւններու ծրագիրներ», ըսաւ ան: Վարչապետը շեշտեց, որ վիզայի դրութեան ստեղծումը
ոչ մէկ ազդեցութիւն կրնայ ունենալ ահաբեկիչներուն վրայ, «իսկ մենք կարիքը ունինք մեզի
սիրող Ծոցի երկիրներուն քաղաքացիներուն: Մենք կարիքը ունինք զբօսաշրջիկներուն եւ մեր
պարտականութիւնն է ամրապնդել երկրին ապահովութիւնը», ըսաւ ան: Սալամ յայտնեց, որ կառավարութիւնը
որոշեց այն թղթածրարները, որոնց շուրջ տարակարծութիւն կայ, յետաձգել չորս օրով եւ քննարկել
զանոնք: Սալամ շեշտեց, որ Լիբանանը հարուածող ահաբեկչական այս գործողութիւններուն
հիմնական նպատակը լիբանանեան ազգային միասնականութիւնը թիրախ դարձնել է: Ան նշեց,
որ Լիբանան ժողովրդավար երկիր է, ուր կայ խօսքի ազատութիւն, սակայն մաղթեց, որ լիբանանեան
մամուլն ու լրատուամիջոցները զգուշութեամբ վարուին ապահովական բնոյթի լուրերուն եւ տեղեկութիւններուն
հետ, ինչպէս նաեւ յարգեն ապահովական կառոյցներուն գաղտնապահութիւնը` խուսափելով տեղեկութիւնները
հրապարակելու արագութիւնը մեծ յաղթանակի մը վերածելէ: Վարչապետ Սալամ կոչ ուղղեց լիբանանեան
քաղաքական բոլոր ուժերուն փութացնելու նախագահի ընտրութիւնը` աւելցնելով, որ ազգային
շահերու կառավարութեան մէջ իրենց գործելաձեւը ուղղակիօրէն հիմնուած է համախոհութեան վրայ: