Պէյրութ. Ռաուշէի «Տիւրոյ» պանդոկին մէջ անձնասպանական գործողութեան հեղինակ մը ինքզինք
կը պայթեցնէ
Մէկ շաբթուան մէջ երրորդը… Անակնկալներու կամ նուաճումներու մասին չէ խօսքը, ոչ ալ քաջագործութիւններու
կամ հերոսական արարքներու, այլ` ահաբեկչութեան, պայթումներու, անձնասպանական գործողութիւններու
եւ անոնց յաջորդող սովորական «արարողութիւններուն», սկսեալ` պայթումին վայրի շրջափակումէն,
հասնելով մինչեւ փրկարար աշխատանքները, պետական անձնաւորութիւններուն դէպքի վայր ժամանումը,
ապա զոհերու եւ վիրաւորներու վերջնական թիւի յայտարարութիւնն ու վերջապէս դատապարտումի
ալիքի բարձրացումը: Այս բոլորին վարժ, սակայն այս բոլորը իր ազգային աւանդը չնկատող
լիբանանցի քաղաքացին, երէկ դարձեալ ինքզինք գտաւ պատկերասփիւռի կայանները ողողած նոյնանման
տեսարաններու դիմաց: Երէկ երեկոյեան ժամը 7:33-ին, Ռաուշէի «Տիւրոյ» պանդոկին մէջ
արձանագրուեցաւ անձնասպանական գործողութիւն մը, որ պատճառեց 11 վիրաւոր: Պայթումը,
որ հետեւանք է անձնասպանական գործողութեան, գործուեցաւ «Տիւրոյ» պանդոկին երրորդ յարկին
վրայ, երբ ընդհանուր ապահովութեան ուժերէն խմբակ մը ներխուժեց պանդոկ: Անձնասպանական
գործողութեան հեղինակը ականուած գօտիի մը միջոցով անմիջապէս ինքզինք պայթեցուցած էր,
երբ Ընդհանուր ապահովութեան ուժերու խմբակը բացած էր անոր սենեակին դուռը: Աւելի
ուշ շրջանառութեան մէջ դրուեցան այնպիսի տեղեկութիւններ, թէ «Տիւրոյ»-ի անձնակազմին մաս
կազմող անհատ մը իմացուցած է անձնասպանական գործողութեան հեղինակը` պանդոկին մէջ ապահովական
կառոյց մը ներկայացնող ուժերու գոյութեան մասին: Անձնասպանական գործողութեան հեղինակը`
Ապտել Ռահման Համիքի (ծնեալ` 1994-ին), սէուտցի քաղաքացի մըն է: