Францішак прыме ўдзел у вялікай сустрэчы пажылых людзей
Святы Айцец прыме
ўдзел у вялікай сустрэчы пажылых людзей, арганізаванай Папскай радай па справах сям’і.
28 верасня 2014 г. на плошчы св. Пятра адбудзецца спатканне пад дэвізам “Благаслаўленне
на доўгае жыццё”, паўдзельнічаць у якім запрошаны бабулі і дзядулі з ўсяго свету.
Пачнецца форум Эўхарыстыяй, якую ўзначаліць Пантыфік. Мэта ватыканскай сустрэчы заключаецца
ў тым, каб паказаць, што старасць, гэта асаблівы і важны этап чалавечага жыцця. “Быць
пажылым чалавекам – не азначае быць непатрэбным, але мець асаблівае пакліканне”, перакананы
старшыня Папскай рады па справах сям’і арцыбіскуп Вінчэнца Палья. “Пажылыя людзі –
не толькі аб’екты, якія патрабуюць нашай увагі і клопату, але таксама і суб’екты новай
жыццёвай перспектывы. (...) Таму іх старасць, а таксама унёсак, які робяць на карысць
свету і Касцёла павінны быць пераасэнсаваны”, лічыць іерарх. Менавіта гэтай мэце будзе
спрыяць сустрэча з Пантыфікам. Больш падрабязная інфармацыя пра форум будзе апублікавана
1 ліпеня 2014 г.