Familja përballë Ungjillit dhe vështirësive, e thirrur për të përçuar jetën dhe fenë:
kjjo është tema që shtjellon Instrumentum Laboris, dokumenti përgatitor i Sinodit
të jashtëzakonshëm mbi familjen, i cili do të mbahet në Vatikan, më 5-19 tetor. Instrumentum
laboris përfshin dhe përmbledh përgjigjet e pyetësorit mbi temat e martesës dhe të
familjes, që u botua në nëntor 2013. Duhet kujtuar se sinodi i tetorit të ardhshëm
është i jashtëzakonshëm, domethënë: synon t’u përgjigjet pyetjeve në lidhje me çështje
të ngutshme të shoqërisë. Detyra kryesore e tij është ajo e analizës së të dhënave
që vijnë nga Kishat vendore, ndërsa udhëzimet baritore do të dalin gjatë sinodit të
2015-tës, me temë: “Jezu Krishti zbulon misterin dhe thirrjen e familjes”. Pjesa
e parë e Instrumentit, me titull “Të komunikosh Ungjillin e familjes sot” parashtron
“të dhënat biblike” për familjen, themeluar mbi martesën ndërmjet burrit dhe gruas,
krijuar sipas shëmbëllimit dhe përngjasimit me Hyjin si bashkëpunëtore e Zotit në
pranimin dhe përçimin e jetës. Pasi përmend dokumentat e shumta të Kishës mbi temën
e familjes, dokumenti nxjerr në pah mosnjohjen e tyre nga ana e besimtarëve, edhe
për shkak të mospërgatitjes si duhet të meshtarëve, që nuk dinë ta trajtojnë drejt
problematikën e martesës dhe të familjes. Pjesa e dytë, me titull “Baritoria e
familjes përballë sfidave të reja”, flet në fillim për rëndësinë e përgatitjes paramartesore
dhe atë të zhvillimit të përshpirtërisë popullore në dobi të familjes. Përmend, pastaj,
rrethanat kritike me të cilat përballen familjet e sotme: dobësia e figurës së atit,
fragmentarizimi si rrjedhojë e divorceve, dhuna dhe shpërdorimi i fëmijëve, tregtia
e qenieve njerëzore, veçanërisht e të miturve, droga, alkolizmi, vartësia nga loja
dhe nga mejtet e komunikimit shoqëror, etj... Një temë tjetër e kësaj pjese është
ajo e rëndësisë që ka tema e punës për jetën e familjes. Vijojnë pastaj temat e tjera,
si ajo e emigracionit, e varfërisë, e konsumizmit, eluftrave, e sëmundjeve etj... Në
fund, kjo pjesë e Instrumentit flet edhe për gjendjet e parregullta familjere dhe
përgjigjet baritore që kërkojnë. Bashkëjetesa në çift, për shembull, i jep konceptit
të familjes natyrë private, kurse për sa i përket çështjes së thjeshtimit të procedurave
për njohjen e pavlefshmërisë së martesave, dokumenti bën thirrje për urti të mëtejshme.
Pjesa e tretë e Instrumentit, me temë “Hapja ndaj jetës dhe përgjegjësia edukuese,
vë në dukje sa pak e njohin bashkëshortët doktrinën e Kishës lidhur me hapjen ndaj
jetës. Prej këndej rrjedh edhe keqinformimi për sa i përket çështjes së mjeteve kontraceptive
dhe metodave natyrore të kontrollit të lindjeve. Kërkohet që të jepen përgjigje më
të thella për përballjen me ideologjinë e “Gender”-it dhe theksohet rëndësia e formimit
fetar në gjirin e familjes, duke vërejtur se moskëmbëngulja e prindërve në përçimin
e fesë vjen si rrjedhojë e pasigurisë së prindërve në çështje fetare. Instrumentum
laboris përfundon me lutjen e shkruar nga Papa Françesku në Festën e Familjes së Shenjtë
të Nazaretit.