Ati i Shenjtë: të gjithë popujt duhet t’i gëzojnë të mirat e shkencës
Shkolla e Observatorit Vatikanas është nismë, që tregon se si të rinjtë e gjithë botës
mund ta ndihmojnë njëri-tjetrin në kërkimin e së vërtetës dhe në dëshminë e bashkëjetesës
së harmonishme. Kështu u tha Papa Françesku, sot paradite, 25 të rinjve, studentë
e të laureuar në astronomi, që marrin pjesë në kursin veror, organizuar nga Observatori
Vatikanas në Kastel Gandolfo, duke filluar nga 1 qershori. Të pranishëm edhe disa
profesorë, etërit jezuitë që e mbajnë shkollën dhe disa punonjës. Tema e edicionit
të 14-të të këtij kursi veror, që organizohet çdo vit dhe zgjat 4 javë, është “Galaktikat
e afërta e të largëta, të reja e të lashta”. Profesorët dhe studentët vijnë nga 23
vende të botës. Pikërisht atyre, Papa u kujtoi se kanë folur jo vetëm për kozmosin,
por kanë ndarë së bashku përshtypje e opinione, kanë vënë në dukje traditat e tyre
kulturore dhe fetare, duke dëshmuar se mund të jetohet në harmoni, pranë njëri-tjetrit.
Fytyra juaj kompozon një mozaik, që përfshin të gjithë popujt e botës, u tha Ati i
Shenjtë: “Është e drejtë që të gjithë popujt të kenë mundësi për punë kërkimore
dhe për formim shkencor. Urimi që të gjithë popujt të gëzojnë të mirat e shkencës
është sfidë, që na impenjon të gjithëve, sidomos shkencëtarët”. Për këtë arsye,
Shkolla e Astrofizikës e Observatorit të Vatikanit bëhet vend, ku të rinjtë ndihmojnë
njëri-tjetrin në kërkimin e së vërtetës, që në këtë rast, theksoi Papa, konkretizohet
në studimin e galaktikave: “Kjo nismë e thjeshtë dhe konkrete tregon se shkencat
mund të jenë mjet i përshtatshëm dhe i frytshëm për të promovuar paqen e drejtësinë”. Ati
i Shenjtë nënvizoi më pas dialogun e Kishës me shkencën, duke pasur parasysh se feja
mund t’i hapë horizonte të reja arsyes: “Në këtë dialog me shkencat, Kisha
i gëzohet përparimit të admirueshëm shkencor, duke pranuar potencialin e jashtëzakonshëm
që Zoti i ka dhënë mendjes njerëzore, ashtu siç gëzohet nëna, e cila me të drejtë,
është krenare kur bijtë e saj rriten ‘në dije, moshë e hir’”. Papa i ftoi
të pranishmit t’i ndajnë njohuritë e tyre me njerëzit e vendeve të origjinës, pasi,
vuri në dukje, vetëm një pjesë shumë e vogël e popullsisë botërore i di këto njohuri,
që i vënë personat përballë pyetjeve të mëdha mbi kuptimin e universit. E kërkimi
i përgjigjeve hap udhën e takimit me Krijuesin, përfundoi Ati i Shenjtë.