Назіральнік Святога Пасаду пры ААН: сям’я – не рэлікт мінулага

“Сям’я – гэта фундаментальная ячэйка чалавечага грамадства”, нагадаў арцыбіскуп Сільвана Тамазі, пастаянны назіральнік Апостальскай Сталіцы пры ААН у Жэневе, выступаючы на 26-й сесіі Рады па правах чалавека. Ватыканскі іерарх падкрэсліў, што “сям’я працягвае дэманстраваць большы запал” у параўнанні з сілай тых, хто спрабуе яе знішчыць “як рэліквію мінулага, перашкоду для эмансіпацыі індывідуума або стварэння свабоднага, шчаслівага і раўнага грамадства”. Адзначаючы “узаемную сувязь” паміж сям’ёй і грамадствам і яе адпаведныя “функцыі ў клопаце і спрыянні супольнаму дабру кожнай асобы і ўсяго чалавецтва” арцыбіскуп Тамазі нагадаў, што “годнасць і правы індывідуума не будуць паменьшаны за кошт увагі да сям’і”. Наадварот: многія людзі менавіта “у моцным і здаровым сямейным асяроддзі, заснаваным на сужэнстве паміж мужчынам і жанчынай”, знаходзяць “абарону, насычэнне і энергію”. Гэта тычыцца ў першую чаргу дзяцей, якія патрабуюць “гарманічнага сямейнага кантэксту”, у якім змогуць атрымліваць “выхаванне і адукацыю” на падставе прыкладу бацькі і маці.

Менавіта ў сям’і, сцвердзіў арцыбіскуп Тамазі, пакаленні сустракаюцца з “любоўю, выхаваннем, узаемнай падтрымкай і перадачай дару жыцця”. Паводле слоў ватыканскага дыпламата, такі погляд прысутнічае “у гісторыі ўсіх культур”, як і ў Паўсюднай дэкларацыі правоў чалавека, якая прызнае “глыбокія і неад’емныя правы і абавязкі сям’і заснаванай на сужэнстве паміж мужчынам і жанчынай”. Іерарх заклікаў да недапушчэння маргіналізацыісям’і і клопату аб ёй не толькі з боку асобных дзяржаваў, але і ўсяго грамадства.