Кардынал Каспер расчараваны падрыхтоўкай да 500-годдзя Рэфармацыі
Кардынал Вальтэр Каспер
расчараваны пазіцыяй нямецкіх лютэран, якія не надалі належнага значэння дасягненням
ў каталіцка-лютэранскім дыялогу, у рамках падрыхтоўкі да святкавання 500-годдзя Рэфармацыі.
У сувязі з набліжаючыміся памятнымі мерапрыемствамі лютэране Германіі падрыхтавалі
збор дакументаў, якія складаюць тэалагічны фундамент Рэфармацыі. Аднак, у яго не ўвайшла
Супольная дэкларацыя адносна навучання аб апраўданні, распрацаваная Апостальскай Сталіцай
і Лютэранскай Царквой у 1999 г. Дакумент паспрыяў вырашэнню аднаго з галоўных спрэчных
пунктаў для католікаў і лютэран. Ён пацвярджае, што і першыя і другія па рознаму разумеюць
апраўданне, але пагаджаюцца адносна больш важных пытанняў.
“Яны не ўзгадалі
аб дэкларацыі ніводным словам. Я не мог ў гэта паверыць. Для мяне, гэта вельмі балюча”,
- прызнаўся былы старшыня Папскай рады спрыяння хрысціянскаму адзінству. На думку
кардынала Каспера, такая пазіцыя не спрыяе добраму святкаванню 500-годдзя Рэфармацыі.
Пурпурат выказаў спадзяванне, што лютэране яшчэ не сказалі апошняга слова ў гэтай
справе, паведамляе польскае каталіцкае інфармацыйнае агенцтва “Kai”.