Vizita e Papës Françesku në Cassano allo Ionio të Kalabrisë. Motoja: “Vij për të kërkuar
falje”
Papa Françesku shkoi dje për vizitë në dioqezën e Cassano allo Ionio, në një udhëtim
që kishte si moto: “Vij për të kërkuar falje”. Fraza i referohet letrës së Atit të
Shenjtë për besimtarët e dioqezës, kur emëroi ipeshkvin e zonës, imzot Nunzio Galantino,
sekretar të përgjithshëm të Konferencës Ipeshkvnore Italiane. Në stilin e tij të zakonshëm,
Ati i Shenjtë u zhyt, sapo mbërriti, në realitetin e vështirë shoqëror kalabrez. Papa
Françesku vizitoi Shtëpinë e rrethit të Kastrovilarit, pastaj të sëmurët në Shtëpinë
“San Giuseppe Moscati”, pas dreke të moshuarit në “Shtëpinë e qetë” pikërisht në Cassano
allo Ionio. U takua me meshtarët, u lut për njërin prej tyre, vrarë nga ‘ndrangheta’
(mafia kalabreze) e përshëndeti familjarët. Gjatë një dite plot me veprimtari, Ati
i Shenjtë hyri në kontakt me disa nga realitetet shoqërore më delikate e më të ndërlikuara
të zonës, para se të kremtonte meshën, që mbylli vizitën, në Fushën e Sibarit. E kështu
ndodhi edhe gjatë drekës, kur Papa drekoi me të varfërit e Karitasit dioqezan. Intervistuam
drejtorin e Karitasit, Raffaele Vidiri: U organizuam, duke u frymëzuar nga
një frazë, që Papa na dërgoi më 18 dhjetor, në të cilën na kërkonte falje që e kishte
emëruar ipeshkvin tonë sekretar të përgjithshëm: atë frazë e shëtitëm në dioqezë,
duke organizuar tre çaste feste, gëzimi e lutjeje në sheshe, në udhëkryqet e rrugëve
e në periferi: ishte Papa, që u kërkonte falje të varfërve, të sëmurëve, jo besimtarëve…
Morën pjesë shumë të rinj e ishin çaste të gëzueshme, por edhe lutjeje për gjithë
popullin. Papa u takua me të varfërit, drekoi me ta, u qëndroi pranë gjatë
gjithë vizitës. Ç’u thotë kjo? Për ne, është gjest afërsie të madhe me njeriun,
në tërësinë e tij. Natyrisht, janë çaste emocionuese, sidomos për ata, që e kaluan
drekën me Papën. A mund të na tregoni cila është gjendja këtu, në Cassano
allo Ionio e ç’kujdes tregoni ju si Karitas për të varfërit? Si në Cassano,
ashtu edhe në të gjithë dioqezën, kemi disa projekte: një mencë për të varfërit në
Altomonte, një qendër për të vegjlit në Cassano e në Castrovillari. Kohët e fundit,
shumë famulli janë aktivizuar, me nxitjen e ipeshkvit e të Karitasit, duke filluar
projekte për të moshuarit, njerëzit me kufizime fizike, të rinjtë, të mënjanuarit
dhe emigrantët. Natyrisht, varfëria që po del më shumë në pah dy vitet e fundit, është
e lidhur me mungesën e punës e me vështirësitë për marrjen e kredive nga ana e familjeve,
që shpesh, nuk kanë as ato 2-3 mijë euro të nevojshme për ndonjë shpenzim të paparashikuar,
ose për të shlyer borxhet e mëparshme. Prandaj, kemi në program edhe një plan për
dhënien e mikrokrediteve, në mënyrë që të ndihmojmë disi në zgjidhjen e këtij problemi.
Përsa i përket punës, po përpiqemi të krijojmë bursa pune tre mujore për njerëz në
vështirësi. Ato do t’u japin mundësinë të mësojnë një zanat të ri. Gjithashtu, do
të përdorim kuponë (voucher) për punime në famulli e në strukturat e dioqezës. Së
fundi, kemi bërë edhe një kurs për kopshtari, në të cilin morën pjesë 10 vetë, pikërisht
për t’u dhënë atyre një zanat, që pastaj mund ta vazhdojnë në të ardhmen. Të
rinjtë e Kalabrisë e kanë braktisur shpesh tokën e tyre për ta kërkuar fatin gjetiu… Po,
kjo problematikë vazhdon: shpesh, ata që vendosin të studiojnë jashtë Kalabrisë, nuk
kthehen më, pavarësisht se këtu kanë lënë pasuri, që mund t’i shfrytëzojnë për punë.