Papa në Kalabri: “Jo N'dragetës. Mafiozët shkishërohen”
Përfundoi me një Meshë solemne, kremtuar në Fushën e Sibarit, në praninë e 250 mijë
vetëve, vizita e Papës në dioqezën e Cassano allo Jonio, në Kalabri. Vetëm nëntë orë
i krijuan mundësitë të takohej me banorët e të njihej me realitetet e ndryshme të
këtyre trojeve, duke u nisur gjithnjë nga të fundmit; të burgosurit, pleqtë, të varfrit,
të sëmurët. Më shumë se një herë Ati i Shenjtë ngriti me forcë zërin kundër krimit.
Mafiozët, nënvizoi me forcë, shkishërohen!
“Adhurim i së keqes e përbuzje
e së mirë së përbashkët: kjo është N'dragheta!”. Papa denoncoi me forcë mafien, dhunën,
idhujt e rremë: “Kjo e keqe duhet luftuar, duhet dëbuar. Duhet t’i themi jo!
Kisha, që impenjohjet shumë për edukimin e ndërgjegjeve, duhet të përpiqet gjithnjë
më shumë e me të gjitha forcat, që të fitojë e mira. E kërkojnë këtë fëmijët, e kërkojnë
të rinjtë tanë, që kanë aq shumë nevojë për shpresë. Për t’iu përgjigjur këtyre kërkesave,
feja mund të na ndihmojë. Ata, që ecin në rrugën e së keqes, si mafiozët, nuk janë
në bashkim me Zotin: janë shkishëruar”. Mesazh i qartë e i fuqishëm ky, që
i përcolli Papa të pranishëmve në Meshën, me të cilën përfundoi ditën e tij në Kalabri.
Mesazh kundër mëkatit, dhunës, mafies: “Kur adhurimit të Zotit ia zë vendin
adhurimi i parasë, i hapet rruga mëkatit, interesit personal e padrejtësisë; kur
nuk adhurohet Hyji, Zoti, njeriu bëhet adhurues i së keqes, si ata, që jetojnë me
prapësi e me dhunë. Toka juaj, tejet e bukur, i njeh mirë shenjat dhe pasojat e këtij
mëkati! Kjo është N'dragheta! Adhurim i së keqes e përbuzje e së mirës së përbashkët!”. Françesku
nënvizoi domethënien e vizitës së tij, si inkurajim për fenë e për dashurinë sepse,
nënvizoi, dashuria e krishterë është dëshmi konkrete e fesë. Foli tejet qartë, Papa:
“Populli, që adhuron Hyjin në Eukaristi, nënvizoi, është popull që ecën në udhën e
dashurisë së krishterë, të bamirësisë”. Duke kujtuar Solemnitetin e Korpit të
Krishtit, shpjegoi se i krishterë është ai, që adhuron Jezusin Eukaristi e ecën me
Të e rri gjithnjë larg adhurimit të idhujve të rremë. Dashuri e krishterë do të
thotë drejtësi, shpresë, dhimbsuri. Këto fjalë ua kundërvuri Françesku fjalëve para,
kotësi, kreni, pushtet, dhunë. Inkurajoi, kështu, Kishën në Kalabri, duke kujtuar
edhe Heparkinë e Ungros, të pasur me traditat e saj greko-bizantine, duke i bërë,
më pas, thirrje, politikës: “I inkurajoj të gjithë, të gjithë barinjtë dhe
besimtarët e Kishës në Kalabri, impenjuar trimërisht në ungjillëzimin e në favorizimin
e stileve të jetës e të nismave, që vënë në qendër të vëmendjes nevojat e të varfërve,
të braktisurve. Edhe autoritetet civile, që përpiqen ta jetojnë impenjimin politik
e administrativ, ashtu si duhet, në shërbim të së mirës së përbashkët”. Pastaj
Papa iu drejtua posaçërisht të rinjve, të cilët i grishi të shpresojnë. E, duke folur
për shpresa, citoi Projektin Polikoro për krijimin e mundësive të punës. Më pas, edhe
rrugën kryesore për të mos e humbur shpresën: është gjithnjë bashkimi me Zotin, që
të ndihmon të fitosh mbi të keqen e mbi dhunën: “Ju, të dashur të rinj, mos
lejoni askënd t’jua rrëmbejë shpresën! E kam thënë shpesh e po e përsëris edhe një
herë: ‘Mos lejoni t’jua rrëmbejnë shpresën!’. Duke e adhuruar Jezusin në zemrat tuaja
e duke qenë gjithnjë të bashkuar me Të, do të dini si t’i kundërviheni së keqes, padrejtësive,
dhunës, me forcën e së mirës, së vërtetës, bukurisë”.