Սպանիոյ նոր թագաւորին երդման արարողութիւնը կատարուեցաւ
«Ֆրանս 24» կը հաղորդէ, որ Սպանիոյ նոր թագաւոր Ֆիլիփէ Զ. երէկ խորհրդարանին առջեւ պաշտօնապէս
երդում տուաւ իբրեւ երկրին նոր միապետ` խոստանալով գահակալութեան ընթացքին յարգել Սպանիոյ
սահմանադրութիւնը: Թագաւորը հիմնականին մէջ արարողակարգային դերակատարութիւն ունի
Սպանիոյ կառավարման հարցին մէջ, բայց եւ այնպէս յոյս կայ, որ ան կրնայ մեղմացնել Սպանիոյ
հիւսիսը մոլեգնող անջատողական տրամադրութիւնները: 46 տարեկան Ֆիլիփէ Զ. պէտք է բաւական
մեծ ջանքեր գործադրէ երկրին միասնականութիւնը պահպանելու, Քաթալոնիոյ անկախացումը կանխարգիլելու
եւ ըմբոստ պասքերը հանդարտեցնելու համար: Ֆիլիփէ Զ. գահը ստանձնեց իր հօրմէն` Խուան
Քարլոսէն, որ երկիրը կառավարած է շուրջ չորս տասնամեակ: Ֆիլիփէ լաւ կրթութիւն ստացած
է Սպանիոյ, ինչպէս նաեւ Քանատայի ու Միացեալ Նահանգներու մէջ: Սպանիոյ թագաւորական տան
նոր ղեկավարին հեղինակութիւնը տակաւին զերծ է լուրջ գայթակղութիւններէ, իսկ ընտանեկան
կեանքը արքայադուստր Լեթիսիայի ու երկու դուստրերուն հետ օրինակ կը ծառայէ շատերու համար: