Papa: të mos na e robërojë zemrën paraja, mburrja, pushteti
Jezusi na kërkon ta kemi zemrën të lirë, larg robërisë së parave, të mburrjes, të
pushtetit. Këtë pohoi Papa Françesku gjatë Meshës së mëngjesit, kremtuar në Shtëpinë
e Shën Martës. Papa nënvizoi se pasuritë e vërteta janë ata, që e shndrisin zemrën,
si adhurimi i Zotit e dashuria e të afërmit. Më pas kujtoi se thesaret e kësaj bote
e rëndojnë dhe e robërojnë zemrën tonë.
Mos grumbulloni
për vete thesare mbi këtë tokë! Rreth kësaj këshille të Jezusit, për të cilën fliste
Ungjilli i sotëm, e shtjelloi gjithë homelinë Papa Françesku. Është këshillë, që të
shtyn të jesh i matur, duke të kujtuar se thesaret mbi tokë nuk janë aspak të sigurta:
prishen, bien në dorë të hajdutëve, që nuk mungojnë kurrë. “Po atëhere, për ç’thesare
e ka fjalën Jezusi?” pyeti Papa. Kryesisht për tre, të cilat i kujton, duke u kthyer
vazhdimisht tek ky argument: “Thesari i parë: ari, paratë, pasuritë…Po gjithsesi
nuk mund të jesh kurrë i sigurt, se edhe t’i vjedhin, apo jo? Nuk je i sigurt as me
investimet! Ndoshta-ndoshta shembet bursa e ti mbetesh pa gjë! E pastaj, më thuaj,
të bën të lum një euro më shumë? Pasuritë, thesar i rrezikshëm, i rrezikshëm… Po pasuritë
janë edhe të mira, mund të përdoren për të bërë shumë sende me vlerë, për të mbajtur
familjen: kjo është e vërtetë! Por nëse ti i grumbullon si thesar, të rrëmbejnë shpirtin!
Jezusi, në Ungjill, kthehet gjithnjë tek ky argument, tek pasuritë, tek rreziku që
krijojnë, kur njeriu i var të gjitha shpresat tek paraja”. Thesar tjetër, vijoi
Papa, është mburrja: thesari për të pasur rëndësi, për t’u dukur para të tjerëve,
mbi të tjerët. Jezusi, vërejti Françesku, e dënon ashpër kreninë, kotësinë, prirjen
për t’u dukur. Të mendojmë për një çast atë që u thotë doktorëve të Ligjit, kur agjërojnë,
kur japin lëmoshë, kur luten, vetëm e vetëm për t’u dukur. Për shihni botë! Mburrja
është krejt pa vlerë, nuk duhet gjë, mbaron shumë shpejt. Këtë nënvizoi Papa, duke
cituar, më pas, Shën Bernardin, që pohon: “Bukurinë tënde do ta brejnë krimbat!”.
Thesari i tretë, nënvizoi, është krenia, pushteti. Këtë kujtonte sot edhe Leximi
i Parë i Liturgjisë, në të cilin flitej për rrëzimin nga froni të mbretëreshës Atalia.
Pushteti i saj i plotë, komentoi Papa, zgjati shtatë vjet e pastaj mbretëresha e madhe
i mbylli ditët e jetës e vrarë. Mbaroi me gjithë kreni, me gjithë pushtet, theksoi
Papa, e shtoi: “Sa njerëz të mëdhenj, burra e gra, të mbushur me vetveten, gjithë
kreni e kotësi, përfunduan në harresë, në mjerim a në pranga". Prej këndej, porositi
për të mos u dhënë pas grumbullimit të parave, pas krenisë, pas pushtetit. Këto thesare,
vërejti, nuk duhen gjë. I bien ndesh Fjalës së Zotit, që na kërkon të grumbullojmë
“thesare në qiell”: “Këtu është mesazhi i Jezusit: ‘Nëse thesari yt është në
pasuri, në kreni, në pushtet, zemra jote do të lidhet me zinxhirë pas tyre. Zemra
jote do të jetë robinë e pasurive, e mburrjes, e krenisë’. E Jezusi na do njerëz me
zemër të lirë! Ky është mesazhi i sotëm. ‘Ju lutem ta keni zemrën të lirë’, na thotë
Jezusi. Na flet për lirinë e zemrës. Sepse vetëm duke e pasur zemrën të lirë, mund
të kesh edhe thesaret e qiellit: dashurinë, durimin, shërbimin ndaj të tjerëve, adhurimin
e Zotit. Këto janë pasuritë e vërteta, që nuk mund të na i rrëmbejë askush. Të tjerat
janë barrë e rëndë për zemrën: e mbërthejnë me zinxhirë, nuk e lënë të lirë”. Zemra
skllave nuk shndrit; mbi të dyndet vazhdimisht errësira. Prandaj, po të grumbullojmë
pasuri mbi tokë, s’bëjmë tjetër, veçse të grumbullojmë errësirë, që nuk na gëzon,
por na mbush me ankth. Vetëm zemra e lirë shndrit veten e të tjerët e i bën ta shikojnë
mirë udhën, që të çon tek Zoti: “Zemra e shndritshme, që nuk është në pranga,
zemra që shkon përpara, edhe për t’u plakur plaket mirë, si vera e vjetër: kur vera
e mirë vjetërohet, është verë e mirë e vjetëruar. Ndërsa zemra, që nuk shndrit, është
si vera e keqe; kalon koha e thartohet e bëhet uthull. Uthull e keqe! Zoti na e dhëntë
urtinë të kuptojmë ku e kemi zemrën, me cilin thesar është e lidhur, që ta çlirojmë,
ta bëjmë të shndritshme e të na japë lumninë e bukur të bijve të Zotit: këtë liri
të vërtetë!”.