Për herë të parë, Çmimi Racinger i jepet një gruaje
Dy studiuesve të shquar, Anne-Marie Pelletier dhe imzot Waldemar Chrostowski, do t’u
jepet, më 22 nëntor, Çmimi Racinger 2014 i Fondacionit vatikanas “Jozef Racinger
– Benedikti XVI”. Për herë të parë, që nga viti 2010 kur u themelua, ky çmim do t’i
jepet një gruaje, studiuese franceze e hermeneutikës dhe ekzegjezës biblike, e cila
është edhe eksperte e çështjes së rolit të gruas në krishterim e në Kishë. Gjithashtu,
ajo ka treguar interes edhe për marrëdhëniet ndërmjet judaizmit e krishterimit, si
edhe për botën murgare. E paraqiti, në një konferencë në Sallën e Shtypit të Selisë
së Shenjtë, kryetari i Komitetit shkencor të Fondacionit, kardinali Camillo Ruini: “Profesoresha
Pelletier është personalitet me rëndësi të madhe për katolicizmin francez të kohës
sonë. Bashkon në vetvete, prestigjin shkencor të merituar me gjallërinë kulturore
dhe përkushtimin e vërtetë ndaj çështjeve me shumë peshë për dëshminë e krishterë
në shoqëri”. Studiuesi tjetër, imzot Waldemar Chrostowski, është i pari polak,
që merr çmimin Racinger. Teolog i shquar, njohës i hebraishtes biblike e asaj bashkohore,
ka marrë pjesë si eskpert në Sinodin mbi Fjalën e Zotit, në vitin 2008. Fusha e tij
e punës është Besëlidhja e Vjetër, shpjegoi kardinali Ruini, në veçanti, profetët,
por edhe letërsia judaike, judaizmi rabinik dhe marrëdhëniet e tij me krishterimin.
Fondacioni vatikanas “Jozef Racinger – Benedikti XVI”, në datat 23 e 24 tetor,
u tha së fundi në konferencë, do të mbajë një kuvend në Universitetin Papnor Bolivarian
në Medellìn të Kolumbisë, me temë: “Respekti për jetën, udhë për paqen”.