Françesku: thirrje për refugjatët: Jezusi ishte një prej tyre
Papa bëri thirrje në favor të refugjatëve, në përfundim të audiencës së përgjithshme,
duke kujtuar Ditën e tyre botërore, që do të kremtohet nesër. “Numri i vëllezërve
refugjatë, vërejti, vijon të rritet e, këto ditët e fundit, mijëra njerëz u detyruan
të largohen nga vatrat e tyre, për të shpëtuar jetën. Miliona familje, miliona,
të ikura nga vende të ndryshme, me besime fetare nga më të ndryshmet, i jetojnë historitë
e tyre, dramat e tyre, me plagë të hapura, që vështirë se do të mund të shërohen. Të
bëhemi të afërmit e refugjatëve, porositi Papa, duke ndarë me ta frikën e pasigurinë
për të ardhmen e duke ua lehtësuar konkretisht vuajtjet. Zoti i ndihmoftë njerëzit
dhe institucionet, që punojnë bujarisht për t’u siguruar refugjatëve mikpritje e dinjitet
e për t’u dhënë arsye, që të shpresojnë”. Më pas, duke folur lirisht, Françesku
shtoi: “Duhet menduar se edhe Jezusi ishte refugjat. Edhe Zotit iu desh të ikte, për
të shpëtuar jetën, me Shën Jozefin e Zojën e Bekuar. Familjes Shenjte iu desh të strehohej
në Egjipt. Krishti ishte refugjat. T’i lutemi Nënës së Tij, që i provoi dhimbjet e
refugjatit, të jetë gjithnjë pranë këtyre vëllezërve e motrave. T’i lutemi së bashku
Zojës së Bekuar për vëllezërit e motrat refugjate. O Mari, Nënë e refugjatëve, lutu
për ne!”.