Irak: xhihadistët përparojnë. Ipeshkvi i Mosulit bën thirrje për paqe
Nuk ndalet avancimi i rebelëve të lidhur me Al Kaedën në Irak. Dhjetra amerikanë janë
shpërngulur këto orë nga baza ushtarake e Baladit, njëra nga qendrat më të mëdha të
stërvitjes në vend. Sekretari i Shtetit amerikan, John Kerry, deklaroi se presidenti
Obama do të marrë vendim së shpejti, por tani për tani, Shtëpia e Bardhë nuk ka ndërmend
të dërgojë trupat e veta në terren. Nuk dihet si do të ndërhyjë Obama, por dihet se
që nga viti i kaluar, Uashingtoni po përdor një numër të vogël dronësh në Irak për
të marrë informacione. Ndërkaq, xhihadistët kanë rrethuar rafinerinë e naftës në Baji
dhe kërcënojnë se do të marrshojnë drejt Bagdadit. Dramatike, gjendja në Mosul, ku
refugjatët kanë arritur në 500 mijë vetë. Na flet me telefon nga qyteti irakian, ipeshkvi
kalde, imzot Emil Shimoun Nona: Gati të gjitha familjet, që janë larguar nga
qyteti, nuk kanë asgjë me vete. U përpoqëm të gjejmë vend në fshatrat e Fushës së
Ninives: ka familje në sallat e katekizmit, në kisha, në shtëpitë e vjetra… Pastaj,
ka të tjerë në çadra, afër Kurdistanit. Nëse gjendja do të mbetet kështu, këta njerëz
do të kenë nevojë për ndihmë urgjente. Banorët i ndihmojnë sa munden, por kjo s’mund
të vazhdojë gjatë, sepse kapaciteti i tyre nuk është i madh. Kemi nevojë urgjentisht
për ushqim, ujë e gjërat më të domosdoshme për jetën, duke pasur parasysh se këtu
bën shumë nxehtë. Xhihadistët vazhdojnë sulmin e tyre. Flitet për kisha e
kuvende të djegura… Një kishë, në dioqezën time u plaçkit dje e pardje. Nuk
dihet nga kush, nuk dihet nëse këta njerëz janë militantë, apo hajdutë. Duhet të themi
se ata, që banojnë afër kishës dhe familjet myslimane janë përpjekur ta mbrojnë. Ia
kanë arritur qëllimit deri dje, pasi ata, që vodhën kishën, ishin të armatosur. Një
strukturë tjetër e Kishës armene është djegur, por duhet thënë se para se të binte
Mosuli, kjo strukturë ruhej nga ushtria. Thatë se kisha mbrohej nga familje
myslimane? Sigurisht që po! Ka familje që mbrojnë shtëpitë e të krishterëve,
kishat, por natyrisht, ka të tjerë që nuk e bëjnë këtë. Në përgjithësi, ata që banojnë
pranë kishave, i mbrojnë ato, por njerëzit e ndjejnë se nuk mund të bëjnë shumë tashmë.
Gjuha që flitet tani, është gjuha e forcës dhe e armëve. Dëshironi të bëni
ndonjë thirrje përmes valëve të Radio Vatikanit? Para së gjithash, duam që
paqja të kthehet në qytetet tona, në të gjithë Irakun, sepse populli irakian është
i lodhur nga kjo situatë, e cila vazhdon prej vitesh. E dyta, kemi nevojë për ndihmë
për të shpërngulurit. Shumë familje të krishtera e myslimane janë jashtë Mosulit e
duhet të gjejmë mënyrën për t’i kthyer në shtëpitë e tyre.