Новая сістэма кандыцыянавання з’явіцца ў Сікстынскай капэле
У Сікстынскай капэле
пачалася ўстаноўка новай сістэмы ачышчэння паветра, кантролю за тэмпературай і вільготнасцю,
а таксама асвятлення. Пачатак гэтай працы быў урачыста дадзены 11 чэрвеня 2014 г.
кіраўніком Губернатарата Дзяржавы Ватыкан, кардыналам Джузэпэ Бэртэла, які благаславіў
групу спецыялістаў і новае абсталяванне. Паводле дырэктара Ватыканскіх музеяў Антоніа
Паўлучы, замена існуючай сістэмы кандыцыянавання амерыканскай фірмы “Carrier” звязана
са значным павелічэннем колькасці наведавальнікаў. Лічбы кажуць самі за сябе – яшчэ
у 1994 г. Ватыканскія музеі наведвала каля 2 млн. чалавек у год, а сёння іх колькасць
у тры разы большая. У сувязі з гэтым уваход у Сікстынскую капэлу прыйшлося абмежаваць.
На сённяшні дзень тут могуць адначасова знаходзіцца каля 700 чалавек, але існуе патрэба
ў павелічэнні колькасці да 2 тыс. Канешне, сістэмы ачышчэння паветра, кантролю за
тэмпературай і вільготнасцю 20-гадовай даўніны з такім аб’ёмам працы не справяцца.
Такім чынам, паводле прафесара Паўлучы, Сікстынская капэла стала ахвярай уласнага
поспеху.
Новая сістэма кандыцыянавання, а таксама сучасная сістэма асвятлення,
распрацаваная нямецкай кампаніяй “Osram” будуць устаноўлены ў пачатку кастрычніка
2014 г. Іх прэзентацыя адбудзецца на спецыяльнай канферэнцыі пад назвай “Сікстынская
капэла праз 20 гадоў.
Замена абсталявання ў Сікстынскай капэле супала з 400-годдзем
з дня смерці аўтара фрэсак, якія яе ўпрыгожваюць – знакамітага Мікеланджэла.