Кардынал: католікі павінны браць удзел у будаванні дабра глабальнага грамадства
Кардынал Рэйнхард
Маркс адзначыў неабходнасць “еўрапейскага гуманізму ў ХХІ стагоддзі”. Да гэтага падштурхоўваюць
глабальныя выклікі, такія як: міграцыя, знішчэнне навакольнага асяроддзя, беднасць
і несправядлівае размеркаванне рэсурсаў. Каардынатар ватыканскай Рады па эканамічных
пытаннях і старшыня нямецкага епіскапату прыняў удзел у дыскусіі на тэму гуманізму
і глабалізацыі з арцыбіскупам Парыжа кардыналам Андрэ Вэн-Труа, і заснавальнікам супольнасці
св. Эгідзія Андрэа Рыкардзі. Яна прайшла 10 чэрвеня 2014 г. вечарам у Парыжы, паведамілі
12 чэрвеня ў курыі Мюнхенска-Фрайзінгскай архідыяцэзіі, якой кіруе кардынал Маркс.
“Хрысціяне не павінны паддавацца спакусе выйсці з грамадскіх спраў”, - сказаў
нямецкі іерарх. Наадварот, удзел у будаванні дабра глабальнага грамадства павінен
быць неад’емнай часткай хрысціянскага жыцця. Каталіцкі Касцёл прапаноўвае праз сваю
паўсюднасць вялікія магчымасці, дапамагаючы пераадольваць моўныя і культурныя межы,
патлумачыў Маркс. Такім чынам, гэта павінна спрыяць абмену ідэямі на еўрапейскім і
міжнародным узроўнях. Для пераадолення межаў трэба мацней выкарыстоўваць экуменічны
і міжрэлігійны дыялог. Як прыклад, кардынал Маркс прывёў мірную ініцыятыву папы Францішка
для Святой Зямлі.