Në Irak, vazhdojnë të përparojnë milicët xhihadistë të Shtetit Islamik të Irakut e
të Lindjes, që sot kanë marrë në dorë qytetin e Ninives, kanë hyrë edhe në Tikrit
e janë në dyert e Samarrës. Dje, morën Mosulin dhe sekuestruan konsullatën turke. Vendi
ndodhet kështu në prag të një lufte civile, 11 vjet pas ndërhyrjes anglo-amerikane
e fundit të regjimit të Sadam Hyseinit. Kryeministri al Maliki ftoi të gjithë qytetarët
të marrin armët për të kundërshtuar avancimin drejt veriut të xhihadistëve sunitë
pranë Al Kaedës. Sipas lajmeve të fundit, ata kanë ekzekutuar 15 anëtarë të forcave
irakiane të sigurisë në provincën e Kirkukut e mbajnë peng 48 punonjës të konsullatës
turke në Mosul, përfshirë konsullin. Milicët kanë hyrë edhe në qytetin e lindjes së
Sadam Hyseinit, në Tikrit dhe ndodhen aktualisht 120 km larg Bagdadit. Sulme edhe
në Qerbela e afër Basrës. Në Kirkuk e në Ninive kanë hyrë në veprim peshmergat kurdë,
për të mbushur boshllëkun e lënë nga ushtria qeveritare. Për të kundërshtuar këtë
valë terrori sunit, propozimi i liderit ekstremist Moktada al Sadr, i cili dëshiron
të formojë brigada të koordinuara nga qeveria për të mbrojtur vendet e shenjta të
shiitëve. Ndërkaq, bashkësia ndërkombëtare shpreh shqetësimin e saj përmes Sekretarit
të Përgjithshëm të OKB-së, Ban Ki-Mun. Edhe Departamenti i Shtetit amerikan, tre vjet
pa tërheqjes së trupave nga Iraku, e konsideron gjendjen “jashtëzakonisht serioze”.
Bashkimi Evropian dhe Lidhja Arabe u bëjnë thirrje të gjitha forcave demokratike irakiane
të rivendosin paqen në vend, duke i detyruar milicët të respektojnë Kushtetutën dhe
vullnetin e qytetarëve në zgjedhjet e fundit të 30 prillit. Që nga fillimi i
këtij viti, dhuna e milicëve sunitë në Irak ka shkaktuar mëse 4 mijë viktima. Patriarkati
kalde i Bagdadit është thellësisht i shqetësuar për fatin e disa mijëra të krishterëve,
që kanë mbetur në Mosul. Të dëgjojmë zëdhënësin, atë Albert Hisham: Patriarku
Sako flet me shqetësim për situatën aktuale në Mosul, e cila është shumë e rëndë.
Të krishterët janë larguar për në fshatrat përreth, por nuk dimë se ç’mund të ndodhë
në ditët që vijnë. Edhe ushtria e policia kanë ikur nga qyteti, sepse e kanë humbur
kontrollin e tij. Patriarkati kalde e sheh zgjidhjen në qeverinë kombëtare, e cila,
fatkeqësisht, nuk është aq e bashkuar, por shqetësohet për sigurinë e krejt Irakut.
Është e nevojshme të formohet sa më shpejt qeveria e bashkimit kombëtar, në mënyrë
që të gjendet zgjidhja ndaj këtij problemi. Cila është gjendja aktuale në
Mosul? Gjendja është shumë e rëndë, sepse të gjithë terroristët kanë hyrë në
qytet, e kanë shtënë atë në dorë, e askush nuk mund të hyjë më pas tyre. Ipeshkvi
i Mosulit po ndihmon të krishterët të dalin nga qyteti, për t’u strehuar në fshatrat
përreth. Për të gjithë ne, pyetja është: cila do të jetë e ardhmja e Irakut dhe e
të krishterëve vendas? Sepse me këto ngjarje, të krishterët e humbin besimin në vendin
e në qeverinë e tyre. Kemi frikë nga emigracioni. Shumë ikin. Thirrja e Patriarkatit
kalde u drejtohet të gjithë njerëzve vullnetmirë në pushtet, që të realizojnë planin
e bashkimit kombëtar të vendit, në mënyrë që të gjithë të jetojmë në një atmosferë
vëllazërimi.