Прадстаўнік Каталіцкага Касцёла звярнуў увагу на праблемы Еўрасаюза
У дзясяты раз у штаб-кватэры
Еўракамісіі ў Брусэлі 10 чэрвеня 2014 г. адбылася сустрэча прадстаўнікоў розных хрысціянскіх
канфесій і іншых рэлігій з лідэрамі ЕС. Такія рэгулярныя спатканні інстытуты ЕС абавязаны
праводзіць у адпаведнасці з Лісабонскай дамовай. Яна вызначае, што Еўрапейскі саюз
вядзе з Цэрквамі і рэлігійнымі супольнасцямі рэгулярны дыялог. Сярод тэм для абмеркавання
былі ў тым ліку: будучыня еўрапейскай інтэграцыі ў святле нядаўніх выбараў у Еўрапарламент,
роля грамадзянскай супольнасці і рэлігійных перакананняў у публічнай прасторы, а таксама
роля і месца Еўропы на міжнароднай арэне.
Дэлегацыю Каталіцкага Касцёла на
сустрэчы ўзначальваў кардынал Рэйнхард Маркс, старшыня Камісіі Епіскапатаў Еўрапейскай
Супольнасці. Ён звярнуў увагу на сацыяльнае вымярэнне еўрапейскай будучыні і падкрэсліў
узрастаючыя: еўра-скептыцызм, эканамічны крызіс і рэлігійную нецярпімасць. На думку
нямецкага іерарха, ЕС можа аднавіць давер грамадскасці, калі будзе ў стане знайсці
канкрэтныя рашэнні праблем: беспрацоўя, змены клімату, міграцыі, трансатлантычных
перамоў па вольным гандлі.
На апошнім кардынал Маркс спыніўся асобна. Ён падкрэсліў,
што, з аднаго боку, свабодны гандаль заўсёды прадугледжвае магчымасць большага росквіту,
але з іншага, рынак мае патрэбу ў выразных правілах. Таму, на яго думку, два трансатлантычныя
партнёры могуць развіваць у глабальнай эканоміцы ясныя нормы, якія грунтуюцца на этыцы.
Пагадненне павінна разглядацца не толькі як магчымасць, але і адказнасць, служыць
не адзінкам, але агульнаму дабру. Прадстаўнік Каталіцкага Касцёла падкрэсліў , што
аб’яднаная Еўропа павінны стаць укладам у лепшы свет.
На сустрэчы з рэлігійнымі
супольнасцямі прысутнічалі Прэзідэнт Еўракамісіі Жазэ Мануэль Барозу, старшыня Еўрапейскай
рады Херман ван Ромпей, а таксама віцэ-прэзідэнт Еўрапейскага парламента Ласла Сур’ян.