Իրավիճակը Հալէպի մէջ. Ջուրը Սիւլէյմանիէ շրջանի բնակիչներուն համար Ազգային Կիւլպենկեան
վարժարանէն կը մատակարարուի։
«Բերիոյ նիուզ» կը հաղորդէ, որ անցեալ շաբաթ, 7 յունիս 2014-ին, երեկոյեան մօտ ժամը 7:00-ին,
Սիւլէյմանիէ շրջանը հրթիռի մը թիրախ դարձած է: Աշխուժ եռուզեռ ունեցող Սիւլէյմանիէի մայր
փողոցի քառուղիին վրայ գտնուող Զինուորական քաղաքական (երկրորդ գրասենեակ) կեդրոնին մօտ
հրթիռ մը ինկած է եւ պայթած է որուն պատճառով զոհուած է 1982-ի ծնունդ Կարօ Աստուրեան:
Արձանագրուած են նաեւ վիրաւորներ, որոնց կարգին նաեւ հայեր` Պայծիկ Մելքոնեան-Չերչեան
եւ Յակոբ Սեմերճեան: Aleppo_waterՀալէպի բնակչութիւնը կը շարունակէ դիմագրաւել կենցաղային
դժուարութիւններ, որոնց շարքին` ջուրի տագնապը: Չորս օրէ ի վեր Հալէպի մէջ ջուրի անջատումին
պատճառով հերթաբար, ջրամատակարարում կը կատարուի քաղաքի զանազան շրջաններուն մէջ: Պետական
ծառայողական կողմեր` իբրեւ ժամանակաւոր լուծում, ջուրի մատակարարում կը կատարեն քաղաքի
կարգ մը շրջաններուն մէջ: Քաղաքի տարբեր կառոյցներու, որոնց կարգին` հայկական ակումբներու
եւ կեդրոններու մէջ եւս կը շարունակուի ջուրի մատակարարման ծառայութիւնը: Ըստ «Բերիոյ
նիուզ»-ին, յատկապէս Սիւլէյմանիէ շրջանին մէջ «Սիմոն Վրացեան» կեդրոնի խնամակալութեան
հովանաւորութեամբ ջրամատակարարում տեղի կ՛ունենայ Ազգային Կիւլպենկեան վարժարանէն: Հազարաւոր
բնակիչներ անխտիր առանց կարգ ու կանոնը խախտելու ամէն օր կը ստանան իրենց ուզած քանակի
ջուրը անվճար: Այն օրը, որ ջուրի տագնապ կ՛ըլլայ քաղաքին մէջ, «Սիմոն Վրացեան» կեդրոնի
տղաքը հերթականօրէն 7-8 ժամ տեւողութեամբ ջուր կը բաժնեն: Այս օրերուն ջրամատակարարում
տեղի կ՛ունենայ նաեւ Նոր Գիւղի բնակիչներուն: