Telefonatë e Papës për pjesëmarrësit e shtegtimit Macerata-Loreto
“Mos kini frikë të ëndërroni një botë më të drejtë”, kështu i inkurajoi Papa Françesku
dhjetra mijëra të rinjtë, të cilëve u telefonoi mbrëmë, ndërsa ishin të mbledhur në
stadiumin Helvia Recina në Macerata, etapa e parë e shtegtimit në këmbë drejt Loretos.
Ky shtegtim organizohet çdo vit nga Lëvizja kishtare “Bashkim e Çlirim”. Përurimi
i edicionit të 36-të, me meshën e kremtuar nga kardinali Pietro Parolin, Sekretar
i Shtetit të Vatikanit. Nëse Zoti është Hyji i të papriturave, ushtoi në stadium
zëri i Françeskut, mos kini frikë të ëndërroni një botë më të drejtë, të pyesni, të
dyshoni e të thelloheni më tej. Ju e dini se feja nuk është trashëgimi, që e marrim
nga të tjerët, feja nuk është mall që blihet, por është përgjigjja e dashurisë, që
e japim lirisht dhe e ushqejmë përditë me durim, ndër suksese e dështime. Mos kini
frikë ta lini veten në krahët e Zotit; Hyji nuk do t’ju kërkojë asgjë, përveçse për
ta bekuar, shumëfishuar, për t’jua kthyer 100 herë aq: “Jam vërtet i lumtur
që shtegtimi juaj, këtë vit, zhvillohet pikërisht në natën, që i paraprin festës së
Shpirtit Shenjt, Rrëshajëve, si edhe takimit të lutjes, që do të mbahet nesër në Vatikan
për të kërkuar dhuratën e paqes në Tokën Shenjte, në Lindjen e Mesme e në mbarë botën”. E
pastaj, sërish, Papa i këshilloi të rinjtë: “mos lejoni t’ju shkurajojnë dështakët
ose frikacakët, që duan t’ju marrin ëndërrat, që duan t’ju mbyllin në mendësitë e
tyre të errta, në vend që t’ju lënë të fluturoni drejt dritës së shpresës. Ju lutem:
mos bini në mediokritet! Në atë mediokritet që të përul, që të bën ngjyrë gri… Por
jeta nuk është gri, jeta duhet luajtur për idealet e mëdha, për gjërat e mëdha”: “…vazhdoni
të rrezatoni përreth jush dritë e shpresë. E ta dini: shpresa nuk zhgënjen, nuk zhgënjen
kurrë! Asgjë nuk humbet me Zotin, por pa Të, gjithçka është e humbur”.