Papa:Shpirti Shenjt na bën të flasim me njerëzit, duke u kumtuar me përvuajtëri Fjalën
e Zotit
Krishti vazhdon të dërgojë Shpirtin Shenjt mbi Kishën e tij: “pa Të nuk ka mision”.
Kështu tha Papa Françesku gjatë meshës së sotme, kremtuar në Bazilikën e Shën Pjetrit,
në Solemnitetin e Rrëshajëve. Papa kujtoi tri karakteristika të Shpirtit Shenjt, i
cili “na tregon udhën”, “na kujton fjalët e Jezusit” dhe “na bën të flasim me Zotin
ne lutje… e me njerëzit në dialog vëllazëror e në profeci”. Eja o Shpirt Shenjt!
Nga goja e besimtarëve, si një zë i vetëm, u përhap në të gjithë kishën lutja që Shpirti
i Shenjtë të vijë mbi të gjithë, ashtu siç pati ardhur mbi dishepujt në Çenakull.
Ngjarje që përsëritet, nënvizoi Papa në homeli, ngjarje që e gjallëron dhe e përtërin
Kishën. Duke përvijuar tri tipare të Shpirtit Shenjt, Papa theksoi: më shumë se Mësues
i doktrinës, Shpirti Shenjt është Mësues i jetës, ai i brendshmi, që na udhëheq në
shtigjet e duhura në të gjitha situatat e na mëson të ndjekim Jezusin. Pastaj, Ai
na kujton gjithçka pati thënë Jezusi. Kjo gjë, shpjegoi Papa, nuk ka të bëjë thjesht
me kujtesën, por me kuptimin e fjalëve të Jezusit, në të cilat Shpirti i Shenjtë na
bën të hyjmë thellë. Sa më shumë t’i përgjigjemi me bujari kësaj vepre të Shpirtit
Shenjt, aq më shumë Fjalët e Jezusit kthehen në dëshmi përmes nesh: “Në thelb,
Shpirti Shenjt na kujton urdhërimin e dashurisë e na kërkon ta jetojmë. Një i krishterë
pa kujtesë nuk është i krishterë i vërtetë: është i krishterë përgjysëm, është burrë
apo grua peng e çastit, që nuk e kthen në thesar historinë e vet, nuk di ta interpretojë
e ta jetojë si histori shëlbimi”. Por, vazhdoi Papa, me ndihmën e Shpirtit
Shenjt mund të interpretojmë aspiratat tona të brendshme dhe ngjarjet e jetës në dritën
e fjalëve të Jezusit: “Kështu rritet brenda nesh dija e kujtesës, dija e zemrës,
që është dhuratë e Shpirtit. Shpirti i Shenjtë përtëriftë në të gjithë ne kujtesën
e krishterë!”. Papa Françesku iu lut edhe shën Marisë të na ndihmojë të kujtojmë
e pastaj u përqendrua në tiparin e tretë të Shpirtit Shenjtë. Ai, tha Papa, na bën
të flasim me Zotin e me njerëzit: me Zotin, përmes lutjes, duke e thirrur Atë; me
njerëzit, përmes dialogut vëllazëror, duke i kuptuar ankthet e shpresat e tyre: “Por
Shpirti Shenjt na bën të flasim edhe me njerëzit në profeci, pra, duke u bërë ‘kanale’
të përvuajtë e të butë të Fjalës së Zotit. Profecia thuhet me çiltërsi, për të treguar
haptas kontradiktat dhe padrejtësitë, por gjithnjë me butësi e me qëllim të mirë.
Të depërtuar nga Shpirti i dashurisë, mund të jemi shenja e mjete të Zotit, që na
do, që shërben, që dhuron jetën për ne”. Në ditën e Rrëshajëve, Kisha lind
për t’u nisur të kumtojë Lajmin e Mirë. Papa kujtoi dy nëna: Kishën Nënë dhe Nënën
e Zotit, shën Marinë. Të dyja virgjëra, nënvizoi, të dyja nëna, të dyja femra, që
nisen për të shërbyer. E kur duhet shërbyer? Papa kujtoi se Jezusi qe i vendosur me
apostujt, të cilëve u tha të mos largohen nga Jeruzalemi pa marrë Shpirtin Shenjt.
Pa Të, përfundoi Papa, nuk ka mision, nuk ka ungjillëzim, nuk ka shërbim.