Беларускіх вернікаў заклікалі да салідарнасці з Папам
Біскупаў, святароў,
кансэкраваных асобаў і вернікаў у Беларусі запрасілі далучыцца да малітвы за мір у
Святой Зямлі. Старшыня Канферэнцыі Каталіцкіх Біскупаў краіны заклікаў да салідарнасці
з папам Францішкам, які стаў ініцыятарам ватыканскай малітоўнай сустрэчы за мір з
удзелам Шымона Перэса і Махмуда Абаса. “З гэтай нагоды, у адпаведнасці з просьбай
Папы, запрашаю духоўна ўдзельнічаць у гэтай малітве. Далучыцца да яе ў глыбіні свайго
сэрца могуць таксама ўсе мужчыны і жанчыны добрай волі. Такім чынам просьба аб міры,
якая будзе ўзнесена каля Гробу святога Пятра, распаўсюдзіцца па ўсёй зямлі, каб магло
ажыццявіцца абяцанне Пана: “Калі двое з вас на зямлі згодна прасілі б аб чым-небудзь,
то станецца ім ад Айца Майго, які ў нябёсах” (Мц 18, 19)”, - напісаў у сваім спецыяльным
звароце біскуп Аляксандр Кашкевіч. Ён запрасіў усіх вернікаў у нядзелю 8 чэрвеня 2014
г. “з’яднацца ў малітве”.