Папа прывітаў удзельнікаў святкавання 70-годдзя высадкі саюзнікаў у Нармандыі
Папа Францішак прывітаў
удзельнікаў урачыстага святкавання 70-годдзя высадкі саюзніцкіх войскаў у Нармандыі,
якое праходзіць 6 чэрвеня 2014 г. у французскім Давіле. Тут сабраліся дзяржаўныя лідэры
і палітыкі з многіх краін свету, а таксама прадстаўнікі Касцёла і іншых рэлігійных
супольнасцяў. У пасланні, падпісаным кардыналам Дзяржсакратаром Пьетра Паралінам,
адзначаецца, што Святы Айцец аддае пашану вайскоўцам, якія пакінулі свае родныя краіны
і высадзіліся на беразе Нармандыі, каб змагацца супраць нацысцкага варварства. Пантыфік
таксама памятае пра нямецкіх салдат, якія былі ўцягнуты ў гэту драму і ўсіх ахвяраў
вайны. Гэта правільна, - напісаў Папа, - каб сучасныя пакаленні выказалі сваю вялікую
ўдзячнасць тым, хто склаў такую цяжкую ахвяру. Святы Айцец нагадаў, што праз перадачу
памяці і навучанне новых пакаленняў павазе да ўсіх людзей, створаных на вобраз Бога,
можна спадзявацца на лепшую будучыню.
Паводле папы Францішка, такія моманты,
як святкаванне 70-годдзя высадкі саюзніцціх войскаў у Нармандыі, нагадваюць, што выключэнне
Бога з жыцця чалавека і грамадства не прыносіць нічога іншага, акрамя смерці і пакут.
Еўрапейскія народы могуць знайсці ў Евангеллі Хрыста, Валадара супакою, карані сваёй
гісторыі і крыніцу натхнення да ўсталявання ўсё больш і больш братэрскіх і салідарных
адносін, перакананы Пантыфік.
Высадка войскаў ЗША, Вялікабрытаніі, Канады і
іншых саюзнікаў на беразе Нармандыі пачалася раніцай 6 чэрвеня 1944 г. Яна была часткай
вайсковай аперацыі “Аверлод”, якая прадугладжвала вызваленне ад нацысцкіх войскаў
паўночнай часткі Францыі. У дэсанце прымалі ўдзел каля 150 тыс. чалавек.