Святы Пасад арганізуе канферэнцыю, прысвечаную душпастырству цыган
“Касцёл і цыгане.
Абвяшчаць Евангелле на перыферыях” – так гучыць тэма ватыканскай сустрэчы прадстаўнікоў
епіскапатаў і нацыянальных кіраўнікоў душпастырства цыган. Форум, арганізаваны Папскай
радай пастырства эмігрантаў і падарожнікаў, пройдзе 5-6 чэрвеня 2014 г. Удзельнікі
прыедуць з 26 краін Амерыкі, Азіі і Еўропы. Сярод іх 10 біскупаў, 16 нацыянальных
дырэктараў (святароў, законных сясцёр і свецкіх вернікаў) і 22 экспераў. 5 чэрвеня
яны сустрэнуцца са Святым Айцом.
Сустрэча мае дзве галоўныя мэты: падагульніць
душпастырскую працу Касцёла на карысць цыган і падрыхтавацца да 50-годдзя візіту Паўла
VI у Памэцыю, з нагоды міжнароднай пілігрымкі цыган, які падкрэсліў адкрыццё Касцёла
да цыганскага народа. Удзельнікі будуць размаўляць пра новыя стратэгіі, шляхі і метады
для адказу на змены, якія закранулі сацыяльную і духоўную складаючую жыцця гэтага
народа.
Душпастырскі клопат пра цыган сістэматычна ажыццяўляецца ў 24 краінах
па ўсім свеце, асабліва ў Еўропе, ЗША, Бразіліі, Аргентыне, Індыі і Бангладэш, дзе
ў хрысціянскіх супольнасцях працуюць святары, дыяканы, кансэкраваныя асобы цыганскай
народнасці. У сваім паведамленні Папская рада пастырства эмігрантаў і падарожнікаў
адзначае, што важным знакам з’яўляецца павелічэнне колькасці святароў і законнікаў
цыган. Іх на гэты момант у свеце каля 170.