На імшы з Папам прысутнічаў сусветнавядомы пастар-канвертыт
У ранішняй св. Імшы,
якую Папа цэлебраваў 3 чэрвеня 2014 г. у капліцы Дому св. Марты, узяў удзел Ульф Экман,
заснавальнік і кіраўнік адной з найбуйнейшых пяцідзясятніцкіх супольнасцяў Швецыі.
21 мая 2014 г. ён быў прыняты разам са сваёй жонкай у Каталіцкі Касцёл. Пасля Эўхарыстыі
адбылася яго кароткая размова з Францішкам. Пантыфік пацікавіўся, у прыватнасці, лёсам
вернікаў, для якіх як заснавальнік супольнасці быў пастырам. У інтэрв’ю для Ватыканскага
радыё Экман распавёў пра дылемы, звязаныя з канверсіяй і адмовай ад супольнасці.
“Год
таму для мяне настаў вырашальны момант, - сказаў былы пастар. - Я ведаў, што павінен
прыняць рашэнне, і адчуваў, што Пан кліча мяне. Раней я адкладаў рашэнне менавіта
праз супольнасць, людзей, якія былі давераны маёй апецы. Але ў рэшце рэшт прыйшоў
да высновы, што калі Пан кліча мяне, я павінен яму давяраць, паверыць, што Ён паклапоціцца
пра гэта. Таму што інакш, я ніколі не буду ў стане зрабіць гэты крок, я буду ў турме”.
Экман прызнаўся, што лідэры яго былой супольнасці за апошнія гады прайшлі
вялікі экуменічны шлях, хоць “і не зайшлі так далёка”, як ён. Яны былі некалькі разоў
у Рыме, таму што сам былы пастар хацеў, каб яны зразумелі яго рашэнне. Ён лічыць,
што шмат хто з яго былых паплечнікаў хоць не падзяляе іх з жонкай кроку, разумее і
паважае яго.