Պքերքէի մէջ Պշարա Ռայի - Միշել Սլէյման հանդիպում

Մարոնի համայնքի Պշարա Ռայի պատրիարքը երէկ Պքերքէի մէջ ընդունեց հանրապետութեան նախկին նախագահ զօր. Միշել Սլէյմանը, որուն հետ քննարկեց լիբանանեան իրադարձութիւնները:
Հանդիպումէն ետք Սլէյման յայտնեց, որ «Ռայի պատրիարքին այցելութիւնը կարեւոր է, յատկապէս նկատի ունենալով, որ վաղն իսկ պիտի մեկնիմ Ֆրանսա»:
Սլէյման շեշտեց, որ Ռայի պատրիարքը ընդվզած է Պաապտայի նախագահական պալատին դռներուն փակուելուն պատճառով` աւելցնելով, որ նախագահական ընտրութիւնը պէտք է արագ կերպով կատարել` ըստ սահմանադրութեան եւ ժողովրդավարութեան:
Սլէյման մաղթեց, որ նախագահական դատարկութիւնը երկարատեւ չըլլայ, նշելով, որ Ռայի պատրիարքը գիտէ, թէ այս առումով ի՛նչ պէտք է կատարել:
Ան հաստատեց Լիբանանի կայունութիւնը պահպանելու անհրաժեշտութիւնը` նկատել տալով, որ պետութիւնը կը պաշտպանէ բոլորը անխտիր եւ անվարան պէտք է յարգել զայն:
Միւս կողմէ, Ռայի պատրիարքը հեռաձայնային հաղորդակցութիւն մը ստացաւ Լիբանանեան ուժեր կուսակցութեան ղեկավար Սամիր Ժահժահէն, որ խստիւ դատապարտեց Ս. հողեր անոր կատարած այցելութեան առիթով անոր դէմ կատարուող ցեխարձակումները` զանոնք նկատելով լիբանանեան Ազգային ուխտին սպառնացող արտայայտութիւններ: