Papa me ipeshkvinjtë e Zimbabvesë: të zinj e të bardhë, së bashku për të mirën e vendit
Përpjekje për pajtim dhe për të shëruar plagët: këtë u kërkoi Papa Françesku ipeshkvinjve
të Zimbabvesë, të cilët i priti sot paradite në vizitën Ad Limina Apostolorum. Papa
u kujtoi barinjve të shtetit afrikan se popullsia e Zimbabvesë përbëhet nga të bardhë
dhe të zinj, që u përkasin fiseve të shumta, prandaj ata duhet t’i prijnë popullit
drejt bashkimit dhe shërimit. Kisha e Zimbabvesë është e thirrur për të qëndruar gjithmonë
pranë popullit, sidomos në çastet e zhgënjimit dhe të dëshpërimit. Në fjalimin,
që u dorëzoi ipeshkvinjve, Papa Françesku përmend kontributin e madh të Kishës Katolike
në vend, para e pas pavarësisë, dhe ndalet tek kriza shpirtërore dhe morale që po
përjeton shoqëria zimbabveze. Ka të krishterë brenda të gjitha palëve në konflikt,
prandaj barinjtë duhet t’u prijnë drejt bashkimit. Populli juaj, shkruan Papa, përbëhet
nga të bardhë e të zinj, nga ndonjë i pasur e shumë të varfër, prej shumë fisesh,
por të gjithë duhet të kthehen kah Zoti e të shërohen. Pajtimi, tha Papa, nuk është
një veprim i izoluar, por një proces i gjatë, falë të cilit çdonjëri duhet të rilindë
në dashuri, në atë dashuri, që shëron me anë të fjalës së Hyjit. Në fund, Papa
u drejtohet meshtarëve, katekistëve dhe laikëve, duke vënë theksin tek formimi shpirtëror,
sidomos tek formimi i çifteve të krishtera, të cilët duhet të ushqehen me pasurinë
e mësimeve morale të Kishës për jetën dhe dashurinë.