Եւրոպական Խորհրդարանի ընտրութիւններուն մէջ իրենց յաղթանակէն ետք, Յոյն Ձախ Արմատականները
կը պահանջեն կառավարութեան հրաժարականը
«Ինթըրֆաքս» լրատու գործակալութիւնը` յղում կատարելով արեւմտեան լրատուական միջոցներուն,
կը հաղորդէ, որ Եւրոպական խորհրդարանի ընտրութիւններուն մէջ ձայներու առաւելագոյն համեմատութիւնը
ստացած արմատական ձախ համախոհութեան (Սիրիզա) ղեկավարը կոչ ուղղած է Յունաստանի մէջ արտակարգ
խորհրդարանական ընտրութիւններ կատարելու: Սիրիզա կուսակցութեան 39-ամեայ ղեկավար Ալեքսիս
Ցիփրաս յայտարարած է. «Ձայներու այսպիսի վերաբաշխման իբրեւ արդիւնք կառավարութիւնը այլեւս
պիտի չկարենայ կայացնել կարեւոր որոշումներ, որոնք պիտի ազդեն երկրի ապագային վրայ»: Ան
նաեւ յայտարարած է, որ Եւրոպական խորհրդարանի ընտրութիւնները կարելի է «հանրաքուէ» նկատել
Յունաստանի կառավարութեան վարած տնտեսական խիստ ծրագիրին շուրջ, որ, ըստ իրեն, այլեւս
կորսնցուցած է իր օրինականութիւնը: