Përfundoi këto ditë vizita e kardinalit Gualtiero Bassetti dhe e delegacionit të Karitasit
të Umbrias në Kosovë. Çasti i fundit, qe kremtimi i meshës në kishën e Shën Gjon Pagëzuesit
në Klinë, më 28 maj. Në bisedimet me ipeshkvin e vendit, imzot Dodë Gjergji u vendos
për thellimin e bashkëpunimit ndërmjet Karitasit të Umbrias dhe Kishës së Kosovës,
sidomos për të ndihmuar familjet në zonën e Klinës. Në këtë rajon, veprojnë që
prej 15 vjetësh, vullnetarët italianë të Karitasit, të cilët nderohen shumë nga popullsia.
Ata organizojnë aktivitete për fëmijët e të rinjtë, por ndihmojnë edhe familjet e
Klinës e të territorit përreth saj, në bashkëpunim me bashkësinë vendore katolike.
Gjatë verës, shtëpia e Karitasit të Umbrias në Kosovë do të jetë e hapur për të gjithë
ata, që duan t’u shërbejnë më të varfërve e familjeve në nevojë. Vizita e kardinalit
Bassetti, kryeipeshkëv i Peruxhës, ishte edhe rasti për të verifikuar punën për ndërtimin
e kompleksit të ri të Karitasit në Leskoc, i cili do të hapet vitin e ardhshëm. Për
këtë projekt, që ka filluar para shtatë vjetëve, kanë kontribuar jo vetëm Karitasi
i Umbrias, por edhe tetë dioqezat e saj. “Këto ditë – citohet kardinali Bassetti në
një komunikatë të Konferencës Ipeshkvnore të Umbrias – mundëm të kontrollonim fazën
përfundimtare të projektit. Në shtëpinë e re në Leskoc mund të strehohen adoleshentë,
të rinj e miq, përveç familjes Mazzali, përgjegjëse për strukturën. Duhet të përfundojnë
dy laboratore: një zdrukthtari, për të cilën i kemi mjetet e punës dhe, një pastiçeri-bukëpjekës,
realizuar me ndihmën e provincës së Trentos, shoqatës “Litari” dhe shoqata “Fëmijët
në botë”. Mjetet informatike i ka dhuruar ushtria italiane. E rëndësishme – përfundon
kardinali – marrëveshja me ipeshkvin, imzot Gjergjin, për koordinimin e të gjitha
veprimtarive bamirëse dhe përcaktimin e një projekti të përbashkët”.