Papa në kishën e Gjetsemanit: E gjithë Kisha është me të krishterët e Tokës së Shenjtë
Pas takimit privat me Patriarkun Ekumenik të Kostandinopojës, Papa Françesku shkoi
në kishën e Gjetsemanit, ku u lut me meshtarët, rregulltarët, rregulltaret dhe seminaristët.
Kisha e Gjetsemanit gjendet pranë kopshtit të ullinjve dhe altari i saj ngrihet mbi
gurin ku, sipas traditës, Jezusi u lut para se ta kapnin për ta gjykuar. Në fillim të fjalës,
që u drejtoi rreth 400 të pranishmëve, Papa kujtoi pjesën e Ungjillit sipas Lukës,
ku tregohet se “Jezusi doli në malin e Ullinjve dhe nxënësit shkuan pas tij” (Lk 22,39).
“Gjendemi në këtë vend të shenjtë – u tha Papa Françesku të pranishmëve – që u shenjtërua
me lutjen e Jezusit, me ankthin e tij, me djersitjen e tij të përgjakshme; që u shenjtërua
mbi të gjitha me “po”-në e tij ndaj vullnetit plot dashuri të Atit”. Në atë vend the
në atë orë të lutjes së Jezusit u vendos drama e botës: “Në atë orë, Jezusi ndjeu
nevojën për t’u lutur dhe për të mbajtur afër vetes nxënësit e vet, miqtë, që e kishin
ndjekur dhe kishin ndarë me të, nga afër, misionin e tij. Por këtu, në Gjetsemani,
ndjekja bëhet e vështirë dhe e pasigurt; mbizotëron dyshimi, lodhja dhe tmerri”. Papa
foli për qëndrimet, që mbajnë nxënësit përballë vuajtjeve të Mësuesit hyjnor: disa
ndjehen larg, të tjerë afër e disa të tjerë të pasigurt. “Do të na bëjë mirë të gjithë
neve – tha – ipeshkvinj, meshtarë, njerëz të shuguruar, seminaristë, në këtë vend,
ta pyesim veten: kush jam unë para Zotit tim, që vuan”. Përballë Jezusit të vuajtur
disa nxënës ikin nga frika, disa i zë gjumi, disa i mbyllin sytë para realitetit,
por ka edhe nga ata për të cilët, si për Marinë dhe Gjonin, “kur gjithçka mbi Golgotë
terratiset dhe çdo shpresë duket se ka marrë fund, vetëm dashuria është më e fortë
se vdekja” dhe miqësia e Jezusit më e çmueshme se çdo gjë: “Miqësia e Jezusit ndaj
nesh, besnikëria e tij dhe mëshira e tij janë dhurata e paçmueshme, që na jep zemër
për ta vijuar me besim ecjen tonë pas tij, pavarësisht nga rrëzimet tona, gabimet
dhe tradhëtitë tona”. Mirësia e Zotit, theksoi Papa, nuk na liron nga angazhimi
për t’iu kundërvënë tunduesit, mëkatit, të keqes, tradhëtisë, “që mund ta përshkojnë
jetën tonë meshtarake dhe rregulltare: “E ndjejmë shpërpjesëtimin mes madhështisë
së thirrjes së Jezusit dhe vogëlsinë tonë, mes lartësisë së misionit dhe brishtësisë
sonë njerëzore. Por Zoti, me mirësinë e tij të madhe dhe me mëshirën e tij të pafundme,
na merr përdore, që të mos mbytemi në detin e zhgënjimit”. Duke përfunduar, Papa
theksoi rëndësinë e pranisë së meshtarëve dhe rregulltarëve në Tokën e Shenjtë, që
“është dhuratë e përgjegjësi”. “Prania juaj këtu është shumë e rëndësishme. E
gjithë Kisha ju është mirënjohëse dhe ju mbështet me anë të lutjes”.