Papa, Peresh-it: paqja kërkon respektimin e lirisë e të dinjitetit të njerëzve
Nisi me një takim prekës, vizita e Papës në Pallatin Presidencial. Në hyrje, presidenti
Peresh i paraqiti Atit të Shenjtë disa fëmijë të sëmurë rëndë nga kanceri, të cilët
kishin shprehur qëkur dëshirën të takohen, para se të vdesin, me Françeskun, Papën,
që i do aq shumë fëmijët. Takim i shkurtër, i ngarkuar më shumë me heshtje shprehëse
e me emocione, sesa me fjalë. Në një situatë, kur çdo fjalë mund të duket e tepërt!
I ngrohtë, i
përzemërt, premtues e më i gjatë se parashikimi, takimi me presidentin Peresh, në
Pallatin Presidencial të Jeruzalemit, qytet, i cili ruan Viset Shenjte, të dashura
për tri fetë, që adhurojnë Hyjin e Abrahamit: “Viset Shenjte nuk janë muzeume,
as monumente për turistë, por vende ku bashkësitë e besimtarëve e jetojnë fenë e tyre,
kulturën e tyre, nismat e bamirësisë. Prandaj duhen mbrojtur vazhdimisht në shenjtërinë
e tyre, duke pasur kujdes jo vetëm për të kaluarën, por edhe për njerëzit, që i frekuentojnë
sot e do t’i frekuentojnë edhe në të ardhmen. Që Jeruzalemi të jetë vërtet qytet i
paqes! Që të shndrisë plotësisht identiteti i tij e karakteri i tij i shenjtë, vlera
e tij universale fetare e kulturore, si thesar për mbarë njerëzimin. Sa gjë e bukur
është kur shtegtarë e vendas mund të hyjnë lirisht në Viset Shenjte e të marrin pjesë
në kremtime”. Papa e vlerësoi presidentin si njeri i paqes e krijues i
paqes dhe i shprehu mirënjohjen për këtë frymë, kaq të domosdoshme në vise, ku s’ka
paqe, ku ndjehet fort nevoja e respektit për lirinë dhe dinjitetin e çdo njeriu, i
cili, siç besojnë ngultas hebrenj, të krishterë e myslimanë, u krijua nga Zoti e
u paracaktua për jetën e pasosur. Pikë e përbashkët kjo, për Papën, nga e cila duhen
nisur përpjekjet për rrugëzgjidhjen paqësore të grindjeve e të konflikteve: “Duhet
refuzuar vendosmërisht gjithçka, që i kundërvihet vijimit të ecjes në rrugën e paqes
e të bashkëjetesës ndërmjet hebrenjve, të krishterëve e myslimanëve: përdorimi i dhunës,
i terrorizmit dhe i çdo lloj diskriminimi për shkaqe racore ose fetare, pretendimi
për të imponuar këndvështrimin tënd në dëm të tjetrit, antisemitizmi, në të gjitha
format e veta, dhuna dhe të gjitha shprehjet e intolerancës kundër njerëzve a vendeve
të kultit, hebreje, kristiane a myslimane”. Më pas Papa kujtoi se në Shtetin
e Izraelit jetojnë e punojnë bashkësi të ndryshme të krishtera. Janë pjesë përbërëse
e shoqërisë, theksoi, e marrin pjesë, me të drejta të barabarta, në jetën civile,
politike e kulturore. Besimtarët e krishterë, shtoi, dëshirojnë të sjellin, duke u
nisur nga identiteti i tyre, kontributin për të mirën e përbashkët dhe për ndërtimin
e paqes, si qytetarë me të drejta të plota që, larg çdo eskstremizmi, impenjohen për
të krijuar frymën e pajtimit e të harmonisë: “Prania e tyre dhe respektimi
i të drejtave të tyre, ashtu si respektimi i të drejtave të çdo emërtimi fetar e i
çdo pakice, janë garanci e pluralizmit të shëndetshëm dhe provë e gjallërisë së vlerave
demokratike, të rrënjosjes së tyre reale në praktikën e në jetën konkrete të shtetit”. Prekës,
sa fillimi, aq edhe përfundimi i këtij takimi, kur Papa e siguroi kreun e shtetit
izraelit se lutet për të, me besim se edhe presidenti lutet për Papën e, që të dy,
luten për paqen, për vlerat që lidhen me të, për prosperitetin e vëllazërimin. Mendimi
i fundit, për të gjithë ata, që vuajnë nga pasojat e krizës në Lindjen e Mesme, me
shpresë se së shpejti plagët do të mbyllen e konfliktet do të marrin fund ndershmërisht: “Paqe
mbi Izraelin e mbi mbarë Lindjen e Mesme! Shalom!”.