Një nga çastet kryesore të ditës së tretë të Papës në Tokën Shenjte, ishte vizita
në Yad Vashem, monument tragjik, lartuar për të mos harruar Holokaustin, shfarosjen
e hebrenjve në masë nga nazistët. Françesku e përshkoi në këmbë perimetrin e Mauzoleut,
për të hyrë, më pas, në Sallën e Kujtimit, ku vendosi një kurorë lulesh dhe përshëndeti
disa hebrenj, që dolën gjallë nga prova e madhe. Në këtë vend, Papa shqiptoi këto
fjalë tronditëse, me vlera përgjithësuese e me ngjyrime të forta biblike:
“Adam, ku je?
(cfr Zan 3,9). Ku je, njeri? Ku përfundove? Në këtë vend, memorial i
Shoah, rijehon pyetja e Hyjit : “Ku je, Adam?”. Në tingujt e kësaj fjale, gjithë
dhimbja e Atit, që humbi birin. Ati e njihte mirë rrezikun e lirisë; e dinte se
biri mund edhe të humbiste… Por ndoshta as vetë Ati nuk mundi ta përfytyronte një
theqafje të tillë, një greminë të tillë. Britma: “Ku je?” këtu, përballë tragjedisë
së pamatshme të Holokaustit, jehon si zë që humbet në honet pa fund… Njeri? Ku
je! Nuk njihesh më! Kush je, njeri? Kush u bëre? Ç’tmerre pate sy e faqe të
kryesh? Ç’të bëri të rrokullisesh poshtë e më poshtë? Nuk është pluhuri i truallit,
nga i cili të përftova! Pluhuri i truallit është gjë e mirë, vepër e duarve të mia. E
as fryma e jetës, që ta fryva në fejzat e hundës. Kjo frymë vjen nga unë, është gjë
shumë mirë (cfr Zan 2,7) Jo, ky hon nuk mund të jetë vetëm vepra jote, e
duarve tua, e zemrës sate…. Kush të zvetënoi? Kush ishte ai, që ta mori fytyrën? Kush
ta ngjiti sëmundjen e pretendimit për të bërë tënden të mirën e të keqen? Kush
ta mbushi mendjen se ishe zot? Jo vetëm që i torturove e i mbyte vëllezërit e tu,
por arrite deri atje, sa t’i flijoje në elterin e vetvetes, sepse t’u mbush mendja
se ishe zot. E sot zëri i Zotit jehon rishtas, këtu; “Adam, ku je?”. Nga thellësitë
e tokës lartohet një gjëmë e thellë: “Mëshirë për ne, o Zot!”. Ty, o Zoti ynë,
të përket drejtësia; ne, çnderimi i vulosur mbi fytyrë e turpi (cfr Bar 1,15). Na
pllakosi mbi kokë një e keqe që s’qe parë kurrë nën këtë qiell (cfr Bar2,2).
E tani, o Zot, dëgjoje lutjen tonë, ahtin e zemrave tona, shpëtona, pash mëshirën
tënde, na shpëto nga kjo përbindshëri! O Hyj i gjithëpushtetshëm, një shpirt i
pushtuar nga ankthi çon zërin kah ti. Dëgjoje, o Zot, e ki mëshirë! Mëkatuam kundër
Teje. Ti mbretëron përgjithmonë e jetës (cfr Bar 3, 1-2). Kujtoju për ne,
në mëshirën tënde! Jepnae hirin të turpërohemi prej veprës së duarve tona njerëzore,
hirin të na vijë turp e marre nga kjo idhujtari e përbindshme, të tronditemi, duke
menduar se përbuzëm e shkatërruam korpin tonë, atë, që Ti e mbrujte me baltë, që i
dhe frymë jete me frymën tënde! Kurrë më, o Zot, kurrë më! “Adam, ku je?” Ja
ku jemi, o Zot, ngarkuar me marren e asaj, që njeriu, krijuar sipas fëtyrës e shembëllimit
Tënd, qe i zoti të bëjë!Kujtoju për ne, në mëshirën tënde!