Yad Vashem pret Papën, atmosferë e re për Piun XII
Papa Françesku pritet me padurim edhe në Yad Vashem, në Jeruzalem, ku do të shkojë
për vizitë të hënën paradite. Në Memorialin, përuruar në vitin 2005, u modifikua diçitura
mbi rolin e Papës Piu XII gjatë Luftës II Botërore, shprehje e mirëpritjes të të rejave
historike e arkivistike, që hedhin dritë të re pozitive mbi figurën e Piut XII dhe
mbi veprimtarinë e tij humanitare në mbrojtje të hebrenjve të përndjekur nga nazistët.
Pikërisht për këtë modifikim, intervistuam atë Giovanni Caputa, anëtar i Komisionit
të vizitës papnore për mediat, studiues i marrëdhënieve hebraiko-kristiane dhe, nga
vitet 2002 deri më 2012, sekretar i delegacionit të Selisë së Shenjtë në bisedimet
me Shtetin e Izraelit:
Përgjigje: - Dy ditë më parë, në Yad Vashem,
drejtori, doktor Avner Shalev, mbajti një takim të shkurtër me shtypin kombëtar, për
të paraqitur programin e kësaj vizite në formë të hollësishme. Theksoi, ndërmjet tjerash,
se për Yad Vashemin është nder i veçantë të presë Papën Françesku, kreun e përfaqësuesin
e një bashkësie prej një miliard e 300 milionë katolikësh. E pastaj kujtoi se njihen
mirë marrëdhëniet tejet të përzemërta të Jorge Mario Bergoglios me hebrenjtë, kur
ishte në Argjentinë, ku pati shprehur shumë herë mendime pozitive për hebraizmin e
pati mbajtur qëndrim shumë të drejtë ndaj Shoah. Papa Françesku do të ndezë pishtarin
në sallën e përkujtimit e do të marrë fjalën, përballë personaliteteve më të larta
të Shtetit të Izraelit. Askush tjetër nuk do të mbajë ndonjë fjalim formal.
Pyetje:
- Atë Caputa, në Muzeun e Holokaustit u modifikua diçitura poshtë fotos së Piut
XII, që e akuzonte Papën për heshtjet e tij gjatë persekutimit nazist kundër hebrenjve.
Si e gjykoni tekstin e ri?
Përgjigje: - Ishte, pra, një modifikim, që
u bë pas viteve të kërkimeve shkencore e kështu, si paraqitet tani, diçitura është
më e gjatë se e mëparshmja si dhe e formuluar më mirë. Mbi të gjitha, nuk titullohet
e as kufizohet thjesht tek Piu XII e Holokausti, Shoah, por tek Vatikani e Shoah.
Veç tjerash, e zbut gjykimin, që përmbante varianti i mëparshëm, duke pasur mirë parasysh
arritjet e reja historike e arkivistike, nga të cilat del figura komplekse e Papës
Paçeli, dalin kushtet tejet të ndërlikuara historike, por edhe ndihma që i dha shumë
veprimtarive humanitare në favor të hebrenjve të përndjekur gjatë viteve të tmerrshme
të persekutimit nazist. Këtu dëshiroj të shtoj një reflektim tjetër, që është element
kronike, por edhe historie: javën e kaluar, ose dhjetë ditë më parë, në Knesset, organizohej
një kremtim publik, kushtuar Shën Gjonit XXIII. Gjatë fjalimeve që u mbajtën, u nënvizua
roli i madh i Anxhelo Ronkalit kur ishte nunc në Bullgari e, pastaj, edhe në Stamboll.
U shpreh mirënjohje ndaj tij, sepse me të vërtetë i ndihmoi shumë njerëz të persekutuar
të vinin në Izrael. Po këtë ndihmë Anxhelo Ronkali nuk do të mund ta jepte, pa miratimin
e Papës Piu XII: sepse nuk mund të ndodhë që një ambasador të veprojë në kundërshtim
me kryetarin e shtetit, që e ka dërguar. Është në vetë logjikën e shërbimeve si ky
i nuncit, ose i delegatit apostolik t’i vërë në jetë fjalë për fjalë, siç mund të
shprehemi, udhëzimet e dhëna nga vetë Papa. E, duke i marrë udhëzimet drejtpërdrejt
nga Piu XII, Anxhelo Ronkali veproi ashtu si e kishte porositur Papa. Këtu dua të
nxjerr një përfundim, që ndoshta është tepër personal, por më duket se përkujtimi
i Gjonit XXIII është shenjë e njohjes, ndonëse jo të drejtpërdrejt, të rolit të Piut
XII, që i ftoi dhe i inkurajoi me të gjitha forcat nuncët, jo vetëm në Bullgari,
ose në Turqi, por edhe në Spanjë, në Portogali e gjetiu. Prej këndej, duke u rikthyer
tek diçitura, ajo përfill edhe arritjet e fundit të kërkimeve shkencore historike,
të cilat flasin me dokumente për shumë veprimtari humanitare që u zhvilluan drejtpërdrejt
ose tërthorazi nga Piu XII, në favor të të persekutuarve. Një pikë tjetër e rëndësishme
është se diçitura e re cek një fragment nga Radiomesazhi i dhjetorit 1942, në të cilin
Papa flet për fatin e qindra mijëra njerëzve të cilët, pa asnjë faj, shpesh për shkaqe
që kishin të bënin me kombësinë e me faresfisin, u dënuan me vdekje ose me rrënim
të plotë fizik e mendor. Fjalë këto, krejt të qarta, për atë që po ndodhte.
Pyetje:
- E dimë se nuncët e fundit, si imzot Sambi, ashtu edhe imzot Franko, u përpoqën
shumë për këtë modifikim…
Përgjigje: - Sigurisht imzot Sambi e imzot
Franko, me të cilin pata kënaqësinë të bashkëpunoj, ftuan gjithnjë për një qëndrim
objektiv. Më kujtohet mirë se në vitin e parë të misionit të tij këtu, në Izrael,
imzot Franko nuk pranoi të shkonte në një kremtim publik në Yad Vashem, pikërisht
sepse nuk ishte dakord me diçiturën, atë të mëparshmen, që i kundërvihej plotësisht
të dhënave objektive e historike; për të mos kujtuar se pjesërisht ishte edhe fyese.
Ky ishte fillimi i një dialogu të përzemërt, ashtu siç dinte të bënte imzot Franko,
për t’i afruar studiuesit e të dyja palëve e për t’i nxitur të përqendroheshin tek
dokumentet e arkivit, larg stereotipeve të gazetarisë sensacionalistike. Prej këndej
studiuesit, këtu, në Izrael, e edhe në të katër anët e botës, e shikuan këtë si detyrë
e nisën kërkimet në arkiva, ku vite me radhë shfletuan dokumentet e nevojshme. U arrit,
kështu, në mars të vitit 2009, kur Yad Vashem në bashkëpunim me Fakultetin salezian
të teologjisë në Jeruzalem, organizuan ditën e studimeve vetëm për specialistët. Aty
dolën më mirë në pah qëndrimet e ndryshme, madje edhe ato kundërshtare, por ama u
krijua klima e besimit, e mirëkuptimit ndërmjet historianëve për t’u dhënë fund toneve
polemike ose ideologjike e për ta shikuar problemin mbi bazën e dëshmive e të dokumentev
historike.