Папа прыбыў у Іарданію – першы этап пілігрымкі ў Святую Зямлю
Папа Францішак прыбыў
24 мая 2014 г. у Аман, дзе пройдзе першы этап яго пілігрымкі ў Святую Зямлю. Самалёт
“Airbus A321” авіякампаніі “Alitalia” з Пантыфікам на борце прызямліўся ў міжнародным
аэрапорце іарданскай сталіцы незадоўга да 13.00 па мясцовым часе. Вітаў Святога Айца
князь Газі, які прадстаўляў караля Абдалу II; Лацінскі Патрыярх Іерусаліма Фуад Туаль;
кусташ Святой Зямлі, айцец П’ербаціста Піцабала; Апостальскі нунцый Джорджа Лінгуа
і іншыя прадстаўнікі грамадзянскіх і рэлігійных уладаў. Іарданскія хлопчык і дзяўчынка
ўручылі Францішку чорную архідэю, сімвал Іарданскага каралеўства. 200 дзяцей на лётным
полі трымалі ў руках іарданскія і ватыканскія сцягі, яшчэ 2000 юнакоў і дзяўчат чакалі
Папу за межамі будынка аэрапорта. Падчас палёту ў Аман Святы Айцец прывітаў журналістаў,
якія размясціліся разам з ім у самалёце, падзякаваўшы ім за прысутнасць падчас пілігрымкі.
Пантыфік падкрэсліў, што іх чакае цяжкая праца і таму паабяцаў маліцца, каб яна была
выканана як мага лепш. Ён паведаміў, што падчас зваротнага рэйсу адкажа на пытанні
журналістаў больш паглыбленна. У апошнім паведамленні на сваім акаўнце ў “Твітэры”
Папа аднавіў запрашэнне да вернікаў “суправаджаць яго малітвамі падчас пілігрымкі
ў Святую Зямлю”.