Shpresa nga vizita e kardinalit të Seulit, në Korenë e Veriut
Kryeipeshkvi i Seulit, Andrew Yeom Soo-jung, është kardinali i parë katolik, që shkeli
në trojet e Koresë së Veriut. Njoftimin e jep agjencia Fides. Hirësia e Tij kapërceu
kufirin dhe kreu një vizitë të shkurtër në zonën industriale të Kaesong, ku, mbi bazën
e një marrëveshjeje ndërmjet dy vendeve, ngrihen ndërmarrje e vepra të tjera industriale,
ku punojnë pranë e pranë qytetarë të veriut e të jugut të Koresë. Shtegtimi i shkurtër
i kardinalit Yeom, që është edhe administrator apostolik i Pyongyang-ut, kishte për
qëllim vizitën në kompleksin, simbol i bashkëpunimit ndërmjet Veriut e Jugut, edhe
në këtë çast tensioni, e takimin me jugkoreanët, që punojnë aty, duke u lënë atyre
një mesazh inkurajimi e shprese. Një zëdhënës i Ministrisë për Bashkimin e Koresë,
në Seul, deklaroi: “Shpresojmë që vizita e kryeipeshkvit të jetë një hap i nevojshëm
për përmirësimin e marrëdhënieve ndërmjet Veriut e Jugut”. Zona industriale e Kaesong-ut
është projekti më i ri për riafrimin e zonave kufitare ndërmjet dy Koreve që, teknikisht,
pas armëpushimit ndërmjet dy gjysmave të vendit, janë ende në gjendje lufte.