Papa në audiencën e përgjithshme: nëse nuk e ruajmë krijimin, do të na shkatërrojë
Nëse ti nuk kujdesesh për Krijimin, krijimi do të të shkatërrojë!” E pohoi Papa Françesku,
në audiencën e përgjithshme, mbajtur sot paradite në Sheshin e Shën Pjetrit, kushtuar
dhuratës shpirtërore të “dijes”. Papa bëri thirrje të ruhen natyra e ambienti, duke
i vlerësuar si dhurata më e bukur, që i bëri Zoti njerëzimit. Dije përtej dijes,
domethënë t’i kuptosh jo vetëm bukuritë e gjithësisë, por të dëgjosh edhe zërin e
Zotit në këto mrekulli, duke e respektuar natyrën e universin, parë si dhuratë për
të gjithë, pa e shpërdoruar, si të ishte natyra pronë private. Kjo shkencë e veçantë,
është një nga shtatë dhantitë e Shpirtit Shenjt. Gjatë katekizmit të sotëm, zhvilluar
më shumë duke folur lirisht, kushtuar temës, që e ka shumë për zemër, Papa Françesku
pohoi se kur njeriu ndalet për të admiruar madhështinë e kozmosit, në të gjitha mrekullitë
e tij, Shpirti Shenjt i flet zemrës, e shtyn të njohë, përtej mrekullimit, shenjën
e dashurisë së pambaruar të Hyjit për të e për gjithçka e rrethon. Prej këndej, njeriu
nuk duhet të kufizohet duke e soditur, e aq më pak, duke e shfrytëzuar sipas interesave
të veta gjithësinë, që Hyji e krijoi për të. Nësa e sodit, duhet ta kuptojë se është
para një dhurate të paçmuar. E një perceptim i tillë i bukurisë e i mirësisë, nënvizoi
Papa Françesku, buron, në një farë mënyre, nga ndjesitë që vetë Hyji provoi në ag
të krijimit: “Nëse Hyji pa se krijimi ishte gjë e bukur e gjë e mirë, edhe ne
duhet të sillemi kështu, ta shikojmë se krijimi, gjithësia, është gjë e mirë dhe e
bukur. Ja, kjo është dhurata e dijes, e njohjes së kësaj bukurie: ta lavdërojmë e
ta falënderojmë Hyjin, që na dha gjithë këtë bukuri. Kjo është udha. Pastaj, kur Hyji
e kreu krijimin e njeriut, Shkrimi Shenjt nuk thotë: ‘E Ai e pa se ishte gjë e mirë’;
thotë: ishte shumë e mirë. Eh? Na afron me Të. Para syve të Hyjit ne jemi gjëja më
e bukur, më e madhe, më e mirë e gjithësisë. ‘Por, o atë, a s’janë engjëjt?’ Jo, engjëjt
janë më poshtë se ne, ne jemi diçka më shumë se engjëjt”. Dhurata e shkencës
është themelore edhe për anën tjetër të medaljes, domethënë, na tërheq vëmendjen të
ruhemi nga rreziku i madh e i përhershëm që na josh ta shikojmë veten si zotër të
krijimit: “Krijimi nuk është pronë, të cilën mund ta zotërojmë sipas qejfit;
e aq më pak, pronë, që u përket vetëm pak njerëzve. Gjithësia është dhuratë, dhuratë
mahnitëse, që na bëri Hyji, për ta ruajtur e për ta përdorur në dobi të të gjithëve,
gjithnjë me respekt të madh e mirënjohje të madhe”. Nuk duhet të jemi pronarë,
prandaj, as shfrytëzues, por mbrojtës të krijimit në tërësinë e tij. Ky, shpjegoi
Papa, është roli i vetëm, që duhet të luajë njeriu: “Ne jemi roje të krijimit.
Po kur e shfrytëzojmë krijimin, rrënojmë shenjën e dashurisë së Zotit (…). Ta ruajmë,
prandaj, sepse po ta shkatërrojmë, do të na shkatërrojë. Të mos e harrojmë kurrë këtë.
Një herë, kur isha në një fshat, dëgjova një fjalë të urtë nga goja e një njeriu
të thjeshtë, që i donte shumë lulet. E ai më tha: ‘Duhen ruajtur këto bukuri, që na
i dhuroi Zoti. Krijimi na u dhurua ne, që të përfitojmë mirë prej tij. Të mos e shfrytëzojmë.
Ta ruajmë. Sepse ju e dini vetë, o atë - kështu më tha burri i thjeshtë – se Hyji
fal gjithnjë. (…). Po krijimi, o atë, nuk të fal kurrë, nëse ti nuk e ruan, ai të
shkatërron!”. Në çastin e përshëndetjeve drejtuar grupeve të gjuhës italiane,
Papa kujtoi se të shtunën e ardhshme, në Aversë të Kampanies, do të shpallen të Lum
meshtari i Pime-s, Mario Vergara si dhe Ngei Ko Lat, shekullar e katekist, mbytur
më 1950 në Birmani, nga urrejtja për fenë: “Besnikëria e tyre heroike ndaj Krishtit,
qoftë inkurajim e shembull për misionarët e, posaçërisht, për katekistët që, në tokat
e misionit, kryejnë veprimtari të pazëvendësueshme apostolike, për të cilën mbarë
Kisha u shpreh mirënjohje të thellë”.